Bu saba vaqtınca işğal etilgen Sudaq ve qomşu köyler suvsız qaldı

İşğal etilgen Qırımnıñ Sudaq şeeri ve onıñ civarındaki meskün yerlerniñ sakinleri eñ az arman ayınıñ 23-ne qadar suvsız qalacaqlar. İşğalli memurlarnıñ malümatına köre, suv ağında qaza oldı.

İşğalli Sudaq yolbaşçısı Kubışev Telegramda bunı bildirdi.

"Suv ağında bir bozuluv oldı. Vaziyet arman ayınıñ 23-ne qadar stabilleştirilir. Şimdilik suvnı avtotsisternalarnen ketireler", — dep haberde qayd etildi.

İşğalli Qırım prokurorlığı teşkerüv başlağanını bildirdi.

İşğalli Qırım yolbaşçısı Aksönov bildirdi ki, arman ayınıñ 22-nde yüz bergen qaza Feodosiya (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri çerçivesinde, yarımadanıñ şarqiy qısmındaki 10 meskün yerge — şu cümleden, Sonâçna Dolına, Qaygador (Orconikidze), Köktebel, Novıy Svit ve Sudaq şeerine suv ketirgen magistral suv borusında oldı.

Bundan evel işğalciler bildirdiler ki, Bağçasaray rayonınıñ altı meskün yerinde quyular qurudı. Yerli sakinlerge suv ketirile.

"Mesele Trudolübivka, Ğlıbokıy Yar, Male Sadove, Velıke Sadove, Sırin ve Kuybışevenen bağlı. Bu meskün yerlerde suv ketirilmesi teşkil etildi. Kazankı köyünde de suv sıñırlavı bar. Anda qaza sebebinden ağlarda suv cedvelge köre berile", — dep haberde qayd etildi.

Читати ще