Qırım tasil nazirligi yarımadada mekteplerge Bilgi kününe tek 1,9 ve 11 sınıf talebeleri içün ve mektep içinde — toplaşuv salonlarında ya da vestibüllerde keçirmege tevsiye etti. Bütün diger talebeler içün bayram lâğu etildi — birinci ders kününi sınıflarda keçirecekler. İşğalli akimiyet terror telükesi yüksek (sarı) seviyesi aqqında hatırlattı.
TASS Rusiye devlet agentliginiñ haberinde bu aqqında aytıla.
"Qırım Cumhuriyeti Tasil, ilim ve gençlik nazirligi tarafından idarelerara iş gruppasınıñ toplaşuvı çerçivesinde Qırım Cumhuriyetiniñ tasil idare organlarınıñ yolbaşçılarına "Bilgi künü"ne bağışlanğan tedbirlerniñ qapalı yerlerde keçirilmesi aqqında tevsiyeler berildi. 1, 9 ve 11-nci sınıf talebeleri içün Bilgi Kününe bağışlanğan tedbirler mektep binalarınıñ toplaşuv salonlarında ya da vestibüllerde, diger sınıf talebeleri içün ise sınıflarda keçirilmesi tevsiye etile", — dep haberde qayd etildi.
İşğalli Qırım yolbaşçısı Aksönovnıñ malümatına köre, bu oquv yılında işğal etilgen yarımadada 229 biñ talebe orta tasil alacaq, olardan 20 biñ 700 birinci sınıf talebesi.
TASSnıñ haber etkenine köre, al-azırda Qırım köprüne yaqın olğan belediye ve Qırımnıñ sıñır rayonlarında, em de Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) toprağında terroristik telükesi yüksek (sarı) seviyede — anda muntazam sürette arbiy talimler keçirile, qoruv inşaatları qurula.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız