Rusiye akimiyeti tarafından 20 yılğa mahküm etilgen 49 yaşında qırımtatar ve "Qırım birdemligi"niñ faalcisi Ansar Osmanov sağlıq alı fenalaşqanını bildirdi.
Onıñ apayı Meryem Osmanova "Qırım birdemligi"ne bunı bildirdi.
Onıñ aytqanına köre, aqayınıñ ayaqlarında ve bütün bedeninde eşken peyda oldı, amma ekim onı teşkermedi ve sebepleri belli degil.
Bundan da ğayrı, qattı tiş ağrısı sebebinden, oña tiş ekimi keldi, lâkin teşkerüv qolçaqsız ve sterillik saqlanılmayıp yapıldı, bu ise tuvğanlarını qasevetlendire.
"Bu şekilde yuqunç tarqala bile, dep qorqam", — dep siyasiy mabüsniñ apayı ayttı.
Meryem Osmanova, aqayınıñ bu sene çiçek ayından berli qorantasınen bağ qurmağanını ve tuvğanlarınıñ mektüpleri müstemlekege kelmegenini bildirdi, çünki tüzetüv müessisesinde uzun müddet devamında tsenzuracı yoq.
"Bu apishanede bulunğan bütün Qırım siyasiy mabüsleriniñ apayları maña çoqtan erkeklerinden mektüp almağanlarını aytalar", — dep qadın qayd etti.
Ansar Osmanov aqqında ne bilemiz
Apiske alınğanına qadar Ansar Osmanov ağaç ressamı olıp çalışqan edi. Şimdi onıñ beş balası babasız öse.
Kiçik aynıñ 9-nda saba Qırımnıñ bir qaç rayonında Qırımtatar faalcileriniñ evleri tintildi. Olarnı FSB hadimleri alıp bardılar. Bir qaç adam, şu cümleden Osmanov, yaqalandı ve Simferpol (Aqmescit) ve Sevastopoldaki (Aqyardaki) FSB idaresine ketirildi. Ansar Bağçasaray rayonınıñ Tankove (Büyük Süyren) köyündeki evinde keçirilgen tintüvden soñ yaqalandı.
Osmanov 2003 senesi, Ukrayina ve dünyanıñ diger memleketlerinde onıñ faaliyeti yasaq etilmegenine baqmadan, Rusiyede terroristik olaraq tanılğan "Hizb ut-Tahrir" islâm siyasiy firqasınıñ iştirakçisi olğanında qabaatlandı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız