Arman aynıñ 9-da Kiyevde Halqara tamır halqlar künü qayd etildi. Nebatat bağçasında mevzulı lokatsiyalar teşkil etildi, işğal etilgen Qırımnıñ şeerleri üslübinde leyhalaştırıldı, kelişken üslüpte yaraştırıldı. Tedbir, resmiy tedbirlerden ve muzakerelerden red etip, böyle şekilde birinci kere keçirildi, dep qayd eteler teşkilâtçılar.
Bu aqta vaqia yerinden Suspilne Qırımnıñ mühbiri haber etti.
"İşte, böyle şekilde festival birinci kere ötkerile. Ondan evel bu kün daa resmiy tedbirlernen qayd etile edi, panel subetleri olıp keçti ve ilâhre. Amma biz bu ananeni başlamağa, qayd etmege, bu künni beraberlikte qayd etmege isteymiz. Er bir yerimiz, Qırımnı añdırsın dep, şeerlernen işaretler yaptıq. Ve, asılında biz nebatat bağçasında bu yerni tamam şunıñ içün sayladıq ki, bizge bu qolaylı qırım müitini mında yaratmaq mümkün kibi köründi", — tarif etti festivalniñ teşkilâtçılarından biri Ayşe Ömerova.
"Qırımnı azat etmek içün mektüpler" lokatsiyasında istegenler işğal yarımadadan kelgen, şimdi Rusiyeniñ müstemlekelerinde bulunğan siyasiy mabüslerge destek sözlerini yaza bileler. Festivalde ukrainlerden toplanğan episi haberler soñra işğal etilgen Qırımda ya da Rusiye Federatsiyasında serbestlikten marum etilgen yerlerge yetkizilecek.
"Şimdiki vaqıtta bizde 223 siyasiy mabusı bar, ve olarnıñ er birine yazmaq mümkün. Eger insannıñ küçü çoq olsa, energiyası çoq olsa, er keske yazmaq mümkün, amma ekseriyetle olar bir, eki, üç adamğa yaza. Kimerde, menim tecribeme köre, öyle oldı ki, 15 adamğa yazdılar ve o tek bir insan edi", – tarif etti Veronika Nesterenko, bunı a siyasiy mabus yaptı, "Serbest Qırımğa mektüpler" yerinde göñülli.
Festivalnıñ teşkilâtçıları çeşit mevzulı yerlerni teşkil ettiler, anda yerli halqlarnıñ — qırımtatarlarnıñ, qaraylarnıñ, qırımçaqlarnıñ — medeniyeti, tarihı, aşları aqqında bilmek mümkün, olar episi Qırımdan keleler. Mında panayır, çolmekçilik, resimler sergileri ve el işleri yarmalığı keçirildi. Bayramnıñ teşkilâtçıları seminar keçirdiler, anda qırımtatar tilinde esas ibareler ve sözler toplamını ögrenmek mümkün edi, em de karaim medeniyetiniñ tarihı aqqında sual-cevap oyunı keçirdiler.
"Aslında, bu tedbir, ukrainlerni, şeerniñ musafirlerini, Ukrainada üçke qadar tamır halqımız olğanınen tanıştırmaq içün bağışlanğan, ve olarnıñ episi Qırımdan. Er bir yerleşüv, Qırımnıñ çeşit şeerlerine bölüne. Mında em ukrain, em de qırımtatar tilinde adları bar", – tarif etti "Qırım cebesi" teşebbüsinden Polina Nişçeret.
Telegram, WhatsApp, Facebook ve YouTube-ta Suspilne Qırım haberlerine abune oluñız