14 yıl apis cezasına mahküm etilgen qırımtatar uquq qorçalayıcısı ve jurnalisti Server Mustafayev endi eki yıldır sert tutuv şaraitinde (STŞ) tutula. Şimdi o, Tambov şeeriniñ 1-nci tüzetüv müstemlekesinde buluna. Adamnıñ areket sisteması, qalqan, yürek ve köz meseleler bar. O, apishanede olmaycaq tedaviylenüvge muhtac.
"Qırım birdemligi"ne Onıñ apayı Mayye Mustafayeva bunı bildirdi, o, yaqında aqayını balalarınen beraber uzun bir körüşüvde ziyaret etti.
2023 senesi arman ayında, SİZOda birinci basamağından soñ, mabüsler oña nevbetteki basamağı sert tutuv şaraitine avuştırılacağınen qorquza ediler, dep qadın ayttı. 2024 senesi kiçik aydan berli o, alâ daa SİZOda, Tambov (RF) şeeriniñ 1-nci tüzetüv müstemlekesinde tutula.
Server Mustafayevniñ sağlıq meseleleri bar, dep onıñ apayı bildirdi. 2025 senesi kiçik ayda, nevrolognen körüşüvden soñ, oña iğneler ve rentgen çekimleri yapıldı. Amma ne ilâc, ne de apishanede teşkerüv keçirdiler. Şimdilik Server kerekli ilâclarnı qoranta yollağan mesaclar sayesinde ala.
Uzaq körüşüvde uquq qorçalayıcı eñ küçük oğlu — üç aylıq Süleymannı ilk sefer kördi.
"Er bir bala babasınen öz ayatında olğan şeylerni paylaşmağa tırışa edi, talimatlarnı diñley edi. Eñ kiçigi ise tek tebessüm etip, babamnıñ qollarında edi. Server onıñ qoqusını ala, areketlerini hatırlay. Körüşüvden soñ: "Onıñ qoqusını duyam", — dep Mayye Mustafayeva ayttı.
Qadınnıñ aytqanına köre, Server boş vaqtında sportnen oğraşa, Quran ve kitaplar oquy. O, diger mabüslerge uquqiy yardım köstermege devam ete, uquqiy vesiqalarnı azırlamağa yardım ete.
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız