İşğalli Qırım akimiyeti Qırımdaki mobil internetniñ söndürilüvi aqqında haber etti. İşğal etilgen yarımadada "dron ücümlerine qarşılıq köstermege" tırışacaqlar. Qırımdaki söndürüvler bir qaç saatten bir qaç künge qadar devam etecek.
"Qırım yolbaşçısı"nıñ işğalli mesleatçısı Oleg Krüçkov bunı bildirdi, dep RİA "Novosti Krım" haber etti.
"Rusiye Federatsiyasınıñ cenübinde ve Qırımda federal emirinen yerli akimiyetniñ iştiraki olmadan mobil internet bir qaç saatke, atta bir qaç künge söndürilecek. Bu, ücümlerge qarşılıq köstermek ve dronlarnı idare etmek imkânını red etmek içün yapıla", — dep haberde bildirildi.
Onıñ aytqanına köre, sesli bağ ve mesajlav çalışacaq. Qırım sakinlerine ise ev ya da belediye Wi-Fi ağlarından faydalanmağa ve yanlarına aqça almağa tevsiye etildi, çünki böyle söndürüvler sebebinden tükân, restoran ve naqliyatnıñ terminalları çalışmaycaq.
Bundan evel Milliy muqavemet merkezi tenbiledi ki, Rusiye işğal etilgen Qırımda, Donetsk ve Luğansk vilâyetleriniñ vaqtınca işğal etilgen topraqlarında yapqanı kibi, kütleviy şekilde cep telefonı bağını ve internetni söndürerek, "raqamlı qamaçav"nı başlata.
"Asılında er şey sade: az malümat — çoq yalan. Kreml, VİETnı "muvafaqiyetler", "referendumlar" ve "daima" aqqında ikâye etmege qolay olğan malümat gettolarına çevire. Bu tek tehnikiy bir mesele degil — bu, ukrayinlerni bütünley izolâtsiya etmege istegen işğalciniñ silâsıdır", — dep MMM qayd etti.
Hatırlatamız ki, UHH bildirdi ki, arman ayınıñ 4-ne keçer gecesi ukraiyn uçucısız uçaq aletleri "Saq" ava limanında 5 Rusiye qırıcı uçağını ve aviatsiya yedegini urdı — bir Su-30SM bütünley yoq etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız