Qırımtatar faalcisi Amethan Abdulvapov, tuvğanlarına yazğan mektübinde, Rusiye Federatsiyasınıñ İrkutsk vilâyetindeki Angarsk şeeriniñ 2-nci tüzetüv müstemlekesinde insult yaşağanını bildirdi. Onı anda bir afta evel ketirdiler. İşğalciler "terror teşkilâtında iştirak etkeni" içün 2023 senesi adamnı 10,5 yılğa mahküm ettiler.
"Qırım birdemligi" cemaat teşkilâtı bunı bildirdi.
Babası Necip Abdulvapov, oğlu evelden yürek meselelerinden şikâyet etmegenini bildirdi. ilk yaz ayında İrkutskta bulunğan 1-nci SİZOdan köçken soñ, o, "ayaqlarında" felç keçirgenini yazdı.
"Tamam bu müstemlekede, o anda barğanda, böyle bir şey oldı. Demek ki, anda bir şey oldı — onıñ [insult] tesadüfen olmaycaq edi", — dep tüşüne o.
Tuvğanlarınıñ aytqanlarına köre, müstemleke siyasiy mabüske tibbiy yardım köstermey edi, amma Amethan ilâclarnı, şu cümleden yürek ilâclarını, valerianka, novokain ve leonurus, bermege rica etti.
Em de siyasiy mabüs adliyecini körmege israr ete, bu ise vaziyetniñ ciddiyligini köstere bile. Qorantası, onıñ insult yaşağanınen bağlı olğanını tüşüne.
Bundan evel Abdulvapov tuvğanlarına tiş meseleleri, basqı ve közyaşlarınıñ şişmesi aqqında şikâyet ete edi. Onıñ tibbiy yardım alğanı belli degil, çünki etap vaqtında onen bağ yoq edi.
Daa evel Qırımtatar maaliy merkezi bildirdi ki, Rusiye tahqiqat izolâtorları ve müstemlekelerinde işğal etilgen Qırımdan eñ az 25 yaşlı siyasiy mabüsni tuta. Çoqusı qanunsız sürette 5 yıldan 18 yılğa qadar apis cezasını aldı.
"Hizb ut-Tahrir davası"nıñ dörtünci Aqmescit gruppası aqqında ne bilemiz
2021 senesi arman ayınıñ 17-nde FSB musulman ve qırımtatarlarnıñ evlerini kütleviy şeklde tintti.
Tintüvlerden soñ işğalli quvetçiler beş insannı "terror teşkilâtınıñ faaliyetinde iştirak etüv"de qabaatlap yaqaladılar (Rusiye Ceza qanunnamesiniñ 205.5-nci maddesi). Aqyarnıñ (Sevastopolnıñ) Nahimov rayonında — faalci Rustem Murasov ve Rustem Tairov, Aqyarnıñ Balıqlava rayonında — Cebbar Bekirov, Bağçasaray rayonında — faalci Zavur Abdullayev, Aqmescit (Simferopol) rayonında — Raif Fevziyev.
2023 senesi qara qış ayınıñ 12-nde Rostov-na-Donu Cenübiy bölgeniñ arbiy makemesi Raif Fevziyevni 17 senege maküm etti. Daa soñra Vlasiha şeeriniñ Apellâtsiya arbiy makemesi ükümni deñiştirmedi.
Daa soñra, 2022 senesi kiçik aydan başlap, bu dörtünci Aqmescit gruppasına daa bir iştirakçi — Amethan Abdulvapov qoşuldı. Qırımtatar, sert rejimli müstemlekede 10,5 senege üküm etildi, soñra ise üküm deñiştirilmedi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız