Ruslar, qanunsız olaraq mahküm etilgen 44 yaşındaki Qırım siyasiy mabüsi Timur Yalkabovnı 17-nci Murmansk tüzetüv müstemlekesiniñ sert tutuv şaraitinde tutalar. Bu türdeki apis rejiminde izolâtsiya, körüşüv ve bağ sıñırlavları, quvetleştirilgen nezaret, malümatqa irişim sıñırlavları, ağır yaşayış şaraiti bar.
Onıñ apayı Aliye Yalkabova "Qırım birdemligi"ne bunı bildirdi.
Bu sene çiçek ayında Timur Yalkabovnı Murmansktaki 17-nci tüzetüv müstemlekesine yerleştirdiler. Qadınnıñ aytqanına köre, Dimitrovgrad apishanesinde ruslar oña "iş yapmağanı içün rejim bozuluvını qayd ettiler". Bu sebepten Murmansk müstemlekesinde qırımtatar STŞne (sert tutuv şaraiti)apis rejiminiñ bir şekli, tecrit, körüşüv ve bağ sıñırlavları, quvetleştirilgen nezaret, malümatqa irişim sıñırlavları, sert yaşayış şaraiti yerleştirildi.
Qırımda Timur Yalkakov qanunsız olaraq 17 yıl apis cezasına mahküm etildi. Onıñ astması ve üçünci derece saqatlığı bar. Aliye Yalkabova ayttı ki, işğalciler oña inhalâtorlarnı bermeyler.
"Şimdilik astmasınıñ alı aqqında bir şey aytıp olamayım, tek fikir yürsete bilem. Etaptan evel oña bir posılka yapıp, içine eki çeşit inhalâtornıñ beşini qoydım. Bundan evel oña yarım yılğa yete edi. Şimdi ise onı bir buçuq ay içinde sarf etti", — dep siyasiy mabüsniñ apayı qayd etti.
Yalkabovnıñ apayınıñ aytqanına köre, Dimitrovgradnıñ 1-nci apishanesinde, andan Murmanskqa avuştırılğan soñ, apishane reberligi Yalkabovğa inhalâtorlarnı, ücümge oğrağanına qadar bermey edi. Memuriyet, ekim tatilde olğanı sebebinden ilâc berilmegenini añlattı.
Siyasiy mabüs Timur Yalkabov aqqında ne bilemiz
Kiçik aynıñ 17-nde saba saat dörtte Qırımda Beloğirsk (Qarasuvbazar), Bağçasaray, Simferopol (Aqmescit), Sevastopol (Aqyar) ve Qırımnıñ Sovet (İçki) rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şıhametov, Ernest İbragimov ve Oleğ Fedorov evlerinde keçirilgen tahqiqat tedbirlerinden soñ Qırımnıñ işğalli FSBsine ketirildi, bundan soñ apiske alındı ve mahkeme-psihiatrik ekspertizalarğa yollanıldı.
2022 senesi saban ayınıñ 22-nde Cenübiy bölgeniñ arbiy mahkemesi Qırım siyasiy mabüsleri Timur Yalkabov ve Lenur Seydametovnıñ qabaatlav qararını ilân etti. Qırımtatar faalcileri sert rejimli müstemlede 17 ve 13 yılğa tutuldı.
2023 senesi qara qış ayınıñ 10-nda Seydametovnı Rusiye mahkemesiniñ apis cezasına itiraz arizasını baqqan soñ Novoçerkassk SİZOsından Lipetsk vilâyetiniñ Yelets şeeriniñ apishanesine etap ettiler.
Dava malümatına köre, qabaatlanğanlarnıñ elinde silâ, patlayıcı, arbiy yedekler yoq edi, olar terror eylemini yapmağa planlaştırmay ediler ve başqalarnı terror eylemlerine çağıra ediler.
Hatırlatamız ki, Qırımtatar maaliy merkeziniñ malümatına köre, Rusiye apishanelerinde yedi saqatlı Qırım siyasiy mabüsi buluna.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız