Nariman Celâl Türkiye Cumhuriyetinde Ukrayinanıñ Fevqulâde ve Vekâletli Elçisi vazifesinde çalışıp başladı ve vesiqalarnıñ kopiyasını Türkiye Tış işler nazirliginiñ protokol müdiri Cemil Miroğluğa berdi.
Elçilik Facebookta bunı bildirdi.
Hatırlatamız ki, Ukrayina Prezidenti Volodımır Zelenskıy Nariman Celâlnı mayısnıñ 14-nde Türkiyedeki Ukrayinanıñ Fevqulâde ve Vekâletli Elçisi olaraq tayinledi.
İşbu tayinlev, Ukrayina eyyetiniñ Türkiyege ziyareti ve Rusiye Federatsiyasınıñ Ukrayinağa qarşı açqan cenkniñ toqtatıluvı boyunca muzakerelerniñ keçirilmesi çerçivesinde yapıldı.
Nariman Celâl aqqında neler bilemiz
- 2013 senesinden başlap Nariman Celâl Qırımtatar Milliy Meclisi reisiniñ birinci muavini vazifesini eda etip, haber-analitik bölüginiñ yolbaşçısı edi.
- 2021 senesi ilk küz ayında Qırımdaki Rusiye işğalcileri tarafından sahte diversiya qabaatlavınen tutulğan edi. 2022 senesi ilk küz ayında Qırım Yuqarı mahkemesi onı sert rejimli müstemlekede 17 yılğa üküm etti.
- 2024 senesi bozarğan aynıñ 28-nde Nariman Celâl Ukrayina ve Rusiye arasında esirni deñiştirüv çerçivesinde Rusiye esirliginden azat etildi. Onen beraber daa doquz Ukrayina vatandaşı azat etildi.
- Azat etilgen soñ Celâl faal uquq qorçalayıcı ve cemaat-siyasiy faaliyetini devam ete, Qırımnıñ işğalden azat etilmesi ve qırımtatar halqınıñ aqları içün küreşe. Hususan, 2025 senesi qara qış ayında o, BMTnıñ Havfsızlıq Şurasına muracaat etip, işğalli akimiyet tarafından basqığa oğrağan ukrayin siyasiy mabüslerine ve Qırım sakinlerine qoltutmağa çağırdı.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız