Canköy sakini devlet hainliginde qabaatlanıp, işğalli Qırım akimiyeti tarafından müstemlekede 20 yılğa üküm etildi. Bundan ğayrı, oña 1 yıl ve 10 ay areket sıñırlanması ve 300 biñ rublelik (tahminen 90 biñ ğrıvnâ) para cezası berildi.
RİA "Novosti Krım" bunı bildirdi.
Agentlikniñ malümatına köre, Ukrayina havfsızlıq hızmetiniñ vekilinen 59 yaşındaki şahısnıñ alâqası 2022 senesi peyda oldı.
"Ukrayin idarecileriniñ vazifesinen o, Canköy ve Krasnoperekopsk (Or Qapı Rusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad— terciman) rayonlarında RF Mudafaa nazirligi ve RF Milliy gvardiya ordularınıñ Federal hızmetiniñ bulunğanı yerleri aqqında malümat topladı", — dep aytıla haberde.
İşğalli tahqiqatnıñ malümatına köre, adam, anbarlarnıñ geolokatsiyalarınen ekran resimlerini UHHUkrayina Havfsızlıq hızmetiniñ vekillerine messencer vastasınen yollay edi.
Hatırlatamız ki, mayısnıñ 28-nde RİA "Novosti Krım" işğal etilgen Qırımda Rusiyede "terror teşkilâtı" olaraq tanılğan "Azov" polkunı maliye etüvde qabaatlanğan yerli sakinniñ mahkemege çıqarılacağı aqqında haber etti. İşğalli akimiyetniñ nezareti altında bulunğan prokurorlıq davanı mahkemege berdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız