Qırımda Rusiye işğalcileri Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakinini belli olmağan yerge alıp kettiler. Şimdilik tutılğan adamnıñ tuvğanları onıñ taqdiri ve bulunğan yeri aqqında bir şey bilmeyler.
Telegram kanalında Ukrayina Yuqarı Şurasınıñ insan aqları vekâletlisi Dmıtro Lubinets bunı bildirdi.
O qayd etti ki, oña ğayıp olğan adam Serğiy Ğrişçenkovnıñ qızı muracaat etti.
"İlk malümatqa köre, mayısnıñ 6-dan 7-ne keçer gecesi Sevastopolda (Aqyarda — terciman) RF FSBsiniñ hadimleri olaraq tanıtqan insanlar onı tuttılar ve belli olmağan yerge alıp kettiler. Bugün tutulğan adamnıñ tuvğanları onıñ taqdiri ve bulunğan yeri aqqında bir şey bilmeyler", — dep Dmıtro Lubinets qayd etti.
O şunı da qayd etti ki, işğal etilgen yarımadada FSB hadimleri olğan belgisiz şahıslarnıñ adamlarnı alıp ketmeleri sıq qayd etile.
Lubinets qayd etti ki, Ğrişçenkovğa qarşı yapılğan areketler şunı boza:
- Halqara grajdanlıq ve siyasiy aqlar aqqında paktnıñ 9-ıncı maddesiniñ 2-nci noqtası, 9-ıncı maddesiniñ 4-ünci noqtası, 14-ünci maddesiniñ 2-nci noqtası;
- İnsan aqları Avropa şartnamesiniñ 5-nci maddesiniñ 2-nci noqtası, 5-nci maddesiniñ 3-ünci noqtası.
"Bu vesiqalar vatandaşnıñ, onıñ tuvğanlarınıñ ve temsilcileriniñ azatlıq sıñırlavı sebepleri, protsessual statusı, tutulğan şahısnıñ bulunğan yeri aqqında malümat almaq aqqını kefil ete. Ukrayina ombudsmanı olaraq bu dava boyunca Rusiye Federatsiyasınıñ insan aqları vekâletlisi Tetâna Moskalkovağa muracaat etip, Ğrişçenkovnıñ bulunğan yeri ve statusı aqqında obyektiv malümatnı ögrenmege rica ettim", — dep Dmıtro Lubinets qoştı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız