Rusiye apishanesinden azat etilgen siyasiy mabüs Oleksandr Sizikov oña qoltutqan er keske teşekkürler bildirdi. O, terrorizmnen iç bir alâqası olmağanını ve mahküm etilmesi adaletsiz olğanını bildirdi.
Sizikovnıñ jurnalistlernen ilk subetini Rus.news resursı derc etti.
"İlk evelâ, men bütün insanlarğa samimiy teşekkürler bildirem ve olarğa hayırlı künlerni tileyim. İnsannı şahsen tanımayıp desteklemek — ruhnıñ büyük küçüdir. Meni biraz bile olsalar, men cinayetçi degil ekenime, ana-babamnı ürmet etkenine ve mesüliyetli olğanına işanmaq kerekler", — dedi o.
O, oña qoltutmaq içün narazılıq numayışlarına çıqqan kör faalci Oksana Osadçağa ayrı teşekkürler bildirdi. Sizikov, qanunsız apislerge qarşı 13 kere piketke çıqqanını da hatırladı.
Oleksandrnıñ anası Olena Sizikova da oña qoltutqan er keske teşekkürler bildirdi.
"Yardım etken er keske, azat etüv meselesiтут oğraşqan ve yardım etken insanlarğa teşekkür bildirem. Er bir ana öz oğlunı, er bir oğul, qızı babasını beklesin, Qırımğa qanunsız sürette apiske alınğanlar, tuvğanları ve dostlarına qaytsın, dep isteyim", — dep o, Qırım birdemligine bergen izaatında ayttı.
Hatırlatamız ki, Krasnoyarsk vilâyetiniñ Minusinsk şeer mahkemesi tarafından qanunsız apis cezasından hastalığı sebebinden azat etilgen siyasiy mabüs Oleksandr Sizikov mayısnıñ 28-nde tuvğanlarınen körüşti ve evi olğan Qırımğa kete, dep Qırım birdemligi bildirdi.
Yazılğanı kibi, Soçi ava limanında adamnı advokat Edem Semedlâyev ve anası qarşıladılar.
"Sizikov bir qaç yıl devam etken taqip, Minusinskniñ Rusiye apishanesine etap etilgen ve apiske alınğan soñ evine, Qırımğa, qayta. Sağlıq vaziyeti sebebinden o, tutulmadan ve apiske alınmadan evel avto qazasındn soñ bütünley kör oldı", — dep aytıla haberde.
Advokat qayd etti ki, Sizikovnıñ apishanelerde ve tahqiqat izolâtorlarındaki 8,5 aylıq apsi qanunsız edi.
"Onı Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki — terciman) tahqiqat izolâtorından Krasnoyarskqa, Minusinsk şeerine alıp kettiler, anda apishanede tuttılar. Sağlıqlı insan içün bu basamaq pek ağır. Er kes, mahküm etilgenler, apiste yatqanlar aytalar ki, bu etap — pek yaramay kameralar, eñ yaramay şarait, bir-eki afta tutula, ve siz devam etesiñiz", - dedi Semedlâyev.
Oleksandr Sizikov — Qırımnıñ Bağçasaray rayonınıñ Turgenivka köyüniñ sakini. O, terror teşkilâtınıñ faaliyetini teşkil etüvde ve akimiyetni zorbalıqnen zapt etüvde qabaatlanıp, 17 yılğa azatlıqtan marum etildi.
"Hizb ut-Tahrir davası"nıñ dörtünci Bağçasaray gruppası aqqında ne bilemiz
2020 senesi oraq ayınıñ 7-nde Qırımda keçirilgen kütleviy tintüvler vaqtında yedi kişi tutuldı. Aqmescitniñ "Kıyiv rayon makemesi" altı mabüs içün tevqif tedbirini sayladı.
İsmet İbrahimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov "makeme" zalında apiske alındı ve Aqmescitteki taqiqat izolâtorına yerleştirildi. Birinci gruppa körme saqatlığına saip olğan Oleksandr Sizikov ev apsine alındı.
Tutulğanlarnıñ episi, Rusiyede terroristik olaraq tanınğan, amma dünyanıñ çoq ülkesiniñ milliy seviyesinde sıñırsız faaliyet etken "Hizb ut-Tahrir" islâm siyasiy firqasında iştirak etkeninde qabaatlanalar.
2023 senesi qara ayında "devlet prokurorı" "Hizb ut-Tahrir" davası çerçivesinde Cenübiy bölge arbiy makemesinde Oleksandr Sizikov içün 18 sene rica etti.
2023 senesi mayısnıñ 17-nde Rusiye Federatsiyasınıñ Cenübiy bölge arbiy makemesinde Oleksandr Sizikovnı 17 senege azatlıqtan marum etüv cezasına maküm ettiler. Alim Sufyanov ve Seyran Hayderinov 12 sene sert rejimli müstemlekege üküm etildi. Birinci dört senesini olar da apishanede keçirecekler.
Rusiye makemesi Sizikovnı sert rejimli apishanege yolladı ve apishaneden soñ daa bir buçuq senege azatlıqtan marum qaldırdı, oña cemaat tedbirleri ve toplaşuvlarğa barmamağa emir etti.
2024 senesi berim ayında Moskva vilâyetiniñ istinaf makemesi "Hizb ut-Tahrir davası"nıñ dörtünci Bağçasaray gruppasına qarşı şikâyet arizasını baqmağa devam etti. Onıñ iştirakçileri Alim Sufyanov, Seyran Hayredinov ve körme qabiliyetini coyğan saqatlı qırımtatar Oleksandr Sizikovdır. Olar tintüvler ve "makeme taqiqatı" vaqtında yapılğan bir sıra bozuvlarnı qayd ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız