Qırımtatar rejissörı Ahtem Seytablayev "Cenk vaqtında Ukrayina kino sanayısı" panel munaqaşasında 78-inci Cannes kinofestivaliniñ Marché du Film kino tenqitçisine "Bİİ: "Sikor" kodu" filmini taqdim etti.
Mayısnıñ 19-nda Ukrayina kinosı meseleleri devlet agentligi bu aqqında haber etti.
Rejissörniñ aytqanına köre, film, Rusiye-Ukrayina cenki tarafından şahsiy yaşayışı yoq etilgen bir qoranta adamı, mahsus hızmetniñ zabiti aqqında ikâye ete.
"Dostları oña yañı yolğa çıqmağa yardım etecekler. Komandir ve kiçik zenaatdaş, mahsus hızmetler tarihında eñ muvafaqiyetli operatsiyalardan birini azırlamağa... ve duşmanlardan intiqam almağa", — dep Seytablayev qayd etti.
Drama 2026 senesine planlaştırılğan. Film "F Films" studiyasınıñ yardımınen Ukrayina Devlet kinosı tarafından Ukrayina Mudafaa nazirliginiñ Baş istihbarat idaresi ve UnitedContentHUB ile işbirlikte çıqarıla.
"Ukrayina arbiy istihbaratınıñ qaramanlığı ve icadı, şübesiz, büyük ekranda bütün dünyanıñ keniş seyirci auditoriyasınıñ diqqatına lâyıq, bediiy film levhası ise bunıñ içün eñ yahşı şaraitni yarata", — dep UnitedContentHUB, "F Films" baş prodüseri Andriy Nogin bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız