Qırımtatar siyasiy mabüsi Appaz Kurtametniñ anası Türkiye prezidenti Recep Tayyip Erdoğanğa video muracaat etip, oğlunı azat etmege yardım etmege rica etti. Kurtamet 2022 senesinden berli siyasiy sebeplerden qabaatlanıp, Rusiye apishanesinde buluna.
Ayşe Kurtamet Facebook saifesinde bu aqqında yazdı.
"Sayğılı prezident, qabaatsız oğlumnı azat etmek içün maña qol tutmañıznı rica etem. Oğlum, diger qabaatsız Qırımtatar gençleri kibi, gençligini Rusiye apishanesinde keçirmesin. Appaznıñ babası Halil de bir yıldan soñ tutulıp, uydurılğan qabaatlavlarnen apiske alındı", — dedi Ayşe Kurtamet.
Qadınnıñ aytqanına köre, olarnıñ evini Rusiye işğalcileri aldılar, ve şimdi o, sürgün etilgen tuvğanlarınıñ azatlığı içün küreşe. O, Türkiyege endi yapılğan deñiştirüvler içün teşekkürler bildirdi ve Erdoğan, onıñ qorantasınıñ azat etilmesine yardım etecegine ümüt etkenini bildirdi.
"Bu küreş menim içün pek qıyın. Bu sebepten men sizge, ana kibi, yalvaram, yardım etiñiz. Şimdi Ukrayina ve Rusiye arasında deñiştirüvler yapıla. Ve mabüsler arasında bizim Qırımtatarlarımız bar. Bizler, Ukrayin halqı olaraq, sizge pek minnetdarmız, çünki deñiştirüvlerniñ keçirilmesine yardım etesiñiz, ve bir çoq esir azat etile. Men ümüt etem ki, Appaz ve babası da çıqacaqlar. Lütfen, oğlumnı qurtarıñız. Onıñ gençlik yılları apishanede keçmesin", — dep Ayşe qoştı.
Evel Türkiye Ukrayina ve Rusiye arasında gumanitar deñiştirüvler meselesinde, hususan arbiy esirlerniñ ve vatandaş reinelerniñ azat etilmesinde defalarca aracılıq ete edi.
Appaz Kurtamet aqqında ne bilemiz
2022 senesi oraq ayınıñ 23. künü Appaz Kurtamet Novooleksiyivka qasabasından Qırımğa aqrabalarına ketti. “Çonğar” KÇKNda aqrabalarınen bağını coydı.
Birazdan belli oldı ki, RF Cinaiy qanunamesiniñ 208. maddesiniñ 1. qısmına binaen Appaznı terror teşkilâtına para bermege qabaatlağan rus quvetçileri oğlannı tuttılar. Taqiqatçılarnıñ sözlerine köre Appaz, "Noman Çelebicihan adına batalyon"da hızmet etken tanışına borc 500 grivna berdi.
Qırımtatar Maaliy Merkezi haber berdi ki, bu "dava"da qabaat, "gizlengen şaatlar"nıñ sözlerine ve rus quvetçilerinen faalca çalışqan böyle degen "mütehassıslar"nıñ neticesine esaslana. Davanen bağlı oturışlar, halqara uquq qaidelerini ciddiy şekilde bozdı, dep Merkez belley.
Umumen belli oldı ki, işğalli makeme Kurtamet içün 10 senelik üküm soradı.
2023 senesi çiçek ayınıñ 20. künü RF tarafından teşkil etilgen Aqmescit makemesi Appaz Kurtametni ukrain göñülli batalyonına para bermege qalaatlap, yedi senege maküm etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız