Çiçek ayınıñ 27-nde "Hizb ut-Tahrir davası"nıñ ekinci Canköy gruppasınıñ iştirakçisi, qırımtatar Ekrem Kroş Rostov-na-Donu şeerindeki Cenübiy bölgeniñ arbiy mahkemesinde soñki sözüni ayttı. Adam qabaatsız olğanını bildirdi.
Bunı Qırım birdemligi bildirdi.
Çiçek ayınıñ 29-nda Rusiye mahkemesi "Hizb ut-Tahrir davası"nıñ ekinci Canköy gruppasınıñ altı mabüsine ükümni ilân etecek. Rusiye prokurorı 41 yaşındaki Osman Abdurazakov, 51 yaşındaki Leman Zekeryayev, 31 yaşındaki Ayder Asanov ve 39 yaşındaki Ekrem Kroş içün 17 yıl apis cezasını istedi. 69 yaşındaki Halil Mambetov ve 55 yaşındaki Refat Seydametovğa prokuror 17,5 yıl apis cezasını istedi.
Siyasiy mabüsniñ aytqanına köre, Rusiye quvetçileri onıñ evine saba saat dörtte kelip, apayı ve balalarını qorquttılar.
"Saba saat 4-te men, musulman olaraq, namaz qılmaq içün uyanam, ve üstüme maskalı adamlar, tanılmağanlar, eñ az on kişi kelip, dört silânı doğrulttılar. Kim terrorist — men ya da olar? Menimce, terrorizm — cemiyetke, onıñ er angi yerinde, qorqu ketirgen bir areket", — dep Ekrem Kroş qayd etti.
Şimdi ise quvetçiler onı terrorizmde ve akimiyetni zapt etmekte qabaatlaylar.
"Bundan soñ, dava vaqtında, tahqiqat keçirilgende biz tahqiqat tedbirlerine kele edik. Bu davanı alıp barğan tahqiqatçıma — ve bu menim "ortaqlarım"a, mında bulunğan er keske — şaatlarğa — doğrudan-doğru sual berdim: "Anda yazğanlarına inanasıñızmı? Biz terroristmizmi?" dep soraylar. O — Gramaşov (menimce, Dmitriy Sergeyeviç) — cevap berdi: "Menim fikrimce, menim tüşünceme köre, iç bir şey deñişmey. Meni işke aldılar, men onı alıp baram. Menim vazifem bar, ve men onı eda etecegim". Men oña: "Öz fikirleriñizni bildiresiñizmi? Öz nazar noqtasınımı? Siz bizni kim dep sayasıñız?, dep soradım. O dedi: "Siziñ aqqıñızda yaramay bir şey aytamam, amma yahşı bir şey de aytamam — sizni tanımayım. Maña berdiler — men bunı yapam", — dep siyasiy mabüs hatırladı.
O şunı da qayd etti ki, Qırımda 1988 senesinden berli qorantasınen yaşay. Canköyde ösip, iç bir vaqıt andan çıqmadı.
"Men apis cezasını beklemeyim. Er şey başta adaletli olsa edi, dava mahkemege kelmez edi. Prokuror onı qabul etmeycek. Bu dava aqqında fikirim — bizim davamız — dava degil, bu ayıp bir uydurmadır. Hususan bu 278-inci, em de 205-inci (bu, cinaiy maddeler aqqında söz yürsetile — muar.) — yersiz ve maña iç bir alâqası olmağan ayıp bir maddedir. Ve olarnı, "ortaqçılar"nı bilip, olar içün de aytam: bunıñ iç bir alâqası yoq. Şunıñ içün aytam — bu davanı qapatıp, bu boş laflarnı toqtatsınlar", — dedi Ekrem Kroş.
Hatırlatamız ki, qırımtatar Ekrem Kroş, Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) 2-nci SİZO hadimleri tarafından oña qarşı zorbalıq qullanılğanını ekinci kere bildirdi.
"Hizb ut-Tahir" davasınıñ ekinci Canköy gruppası aqqında ne bilemiz
Qara qış ayınıñ 24-ünde Canköy rayonınıñ köylerinde insanlarnıñ evleri tintilgen soñ altı qırımtatar adamı tutuldı ve Aqmescitke ketirildi. Anda ertesi künü olar tevqif etildi ve 1. SİZOda qapatıldı. Söz Ekrem Kroş, Ayder Asanov, Leman Zekeryayev, Osman Abdurazakov ve Refat Seydametov aqqında yürsetile.
Arman ayında olarnıñ cinaiy davasınıñ bilgileri Rostov-na-Donudaki Cenübiy bölge arbiy makeemsine yollandı. Olar, Rusiyede yasaqlanğan ve dünyanıñ ülkeleriniñ çoqusında serbest şekilde faal etken "Hizb ut-Tahrir" islâm fırqasında iştirak etmege qabaatlanalar.
Berim ayınıñ 13-ünde belli oldı ki, "dava"nıñ iştirakçileri Aqmescitteki taqiqat izolâtorından Rostov-na-Donudaki 1. SİZOğa etap etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız