Перейти до основного змісту
Eskender Bariiev Birleşken Milletler Teşkilâtınıñ Daimiy Forumınıñ sessiyasında, Nyu-York, AQŞ, 2025 senesi çiçek ayınıñ 21-i. Facebook/Ескендер Барієв

BMTnıñ Tamır halqları meseleleri daimiy forumınıñ 24-nci sessiyasında Qırımtatar Milliy Meclisi ilk sefer teşkilât olaraq degil de, tamır halqınıñ parlamenti olaraq taqdim etildi.

Çiçek ayınıñ 21-nde Qırımtatar maaliy merkeziniñ reisi Eskender Bariiev Facebook saifesinde bunı bildirdi.

"Şimdi Qırımtatar Milliy Meclisiniñ vekilleri tamır halq mebusları yanında, meselâ, Norvegiya, İsveçiya ve Finlândiya Saami parlamentleriniñ vekilleri yanında bir yer alacaqlar", — dep añlattı o.

QMMniñ reisiniñ aytqanına köre, o, prezident tarafından teşebbüs etilgen "Ukrayinanıñ tamır halqları aqqında" qanun leyhasınıñ yerine ketirilmesi ve Meclisniñ tamır halqınıñ temsil organı olaraq uquqiy statusınıñ pekitilmesini bekley.

Evel Eskender Bariiev Suspilne Qırımğa mahkeme vastasınen Meclisni qırımtatarlarnıñ temsiliy organı olaraq tanımağa tırışqanını ayttı.

Hatırlatamız ki, çiçek ayınıñ 21-nde, çiçekniñ 4-nde BMTniñ tamır halqları meseleleri daimiy forumınıñ mütehassısı olaraq saylanğan qırımtatar Süleyman Mamutov, New Yorkta tedbirniñ 24-nci sessiyasınıñ açılışında kene de Forumnıñ maruzacısı oldı.

Birleşken Milletler Teşkilâtınıñ Tamır halqlar meseleleri daimiy forumı, bütün dünyada tamır halqları meselelerinen oğraşqan Birleşken Milletler Teşkilâtınıñ esas organıdır. O, er yıl toplaşıp, tamır halqlarınıñ meseleleri ve çağıruvlarını muzakere ete.

Forumnıñ maruzaları/esapları Birleşken Milletler Teşkilâtı ve onıñ aza devletleri içün tevsiyeler bere. Hususan, tamır halqlarınıñ siyasiy, medeniy ve diger kollektiv aqlarınıñ qorçalanmasına dair.

Telegram, WhatsApp, Facebook, TikTok ve YouTubede Suspilne Qırım haberlerine abune oluñız

Топ дня
Вибір редакції