Qara deñizdeki yermay çıqarıcı platformalardan birinde Ukraina Silâlı Quvetleriniñ Mahsus operatsiyaları quvetleri muvafaqiyetli operatsiya keçirip, işğalcilerniñ radiolokatsiya stantsiyasını ve Rusiyege Ukrainanı kamikadze dronları vastasınen ücüm etmege yardım etken cihazlarnı yoq ettiler.
USQniñ Mahsus operatsiyalar quvetleriniñ matbuat hızmeti bu aqqında haber berdi.
Bildirildi ki, "Mohacer-6" iran uçucısız aletleriniñ istihbarat işini yahşılaştırmaq maqsadınen ruslar, qanunsız olaraq zapt etilgen yermay çıqarıcı platformalardan birini qullanalar. Şu cümleden anda onıñ işiniñ uzunlığı ve raidusını uzatqan cihazlarnı qoydılar. İstihbarat etmek ve Ukrainanıñ cenübindeki kritik astyapı obyektlerine "Shahed" kamikadze dronları vastasınen ücüm etmek içün rus askerleri mezkür dronnı qullana ediler.
"Bundan ğayrı, duşman platformağa deñiz astındaki obyektlerni (motor gemiçiklerinden büyük gemilerde qadar) tapmaq içün "Neva-B" radiolokatsiya sistemasını qoydı. Bu RLS yardımınen ruslar, Qara deñizniñ şimal-ğarbiy qısmındaki vaziyet kontrol eteler", — dep bildirildi.
SSOnıñ 73. deñiz merkeziniñ mahsus operatsiyası, Rusiyeniñ muntazam quaravul uçaqları ve flotunıñ zonasında keçirildi.
"Gece maalinde SSOnıñ 73. deñiz merkeziniñ gemileri platformağa yaldap keldiler. Mahsus yoq etici areketler yapqan soñ obyekt patlatıldı. Askerler gruppası telükesiz yerge ketip, duşman maqsadını yoq etti", — dep ukrain askerleri qayd ettiler.
USQniñ Mahsus operatsiyalar quvetleriniñ matbuat hızmeti qayd etti ki, muvafaqiyetli mahsus operatsiya yardımınen Qara deñizniñ şimal-ğarbiy qısmında gemiler içün yaldap ketmek daa telükesiz oldı ve RFnıñ imkânları sıñırlandı.
Telegram ve Facebookta Suspilne Qırım haberlerine abune oluñız
