Muhtariyetniñ prokurorlığı, işğal etilgen yarımadanıñ tınç yaşağan sakinlerini azaplağan Qırım Ukraina Telükesiz Hızmetiniñ üç eski işçisine qarşı qabaat aktını makemege yolladı. Olarnı 15 senege maküm ete bilirler.
QMC ve Aqyar ş. prokurorlığınıñ matbuat hizmeti bu aqqında haber berdi.
Bildirildi ki, 2014 senesi yarımada işğal etilgen vaqıt qabaatlanğan adamlar, Qırım MCde UTHniñ işçileri olıp çalışaqan ediler, faqat RFnıñ teklifini alıp, işğal “Qırım Cumhuriyeti ve Aqyar şeerindeki Rusiye UFAB”de çalışmağa başladılar.
“Öz areketleri ve qararlarınen olar, işğalci devletniñ ukrain taraflı sakinlerni taqip etüv siyasetini yerine ketirmege yardım ettiler. Şu cümleden, adamlar, işğal etilgen Qırımnıñ sakinini tutmağa ve azaplamağa yardım ettiler”, - dep bildirildi.
Ukrain uquq qorçalayıcılarınıñ malümatına köre qabaatlanğan adamlar onıñ tükânını qanunsız olaraq tinttiler ve vesiqa almadan insannı tevqif ettiler. Küç, elektrik aqım ve ruhiy basım qullanaraq, olar onı patlayıcı malzemelerni saqlağanını aytmağa mecbur ettiler.
“Bu areketler, cenk cinayeti ve 1949 senesi cenk vaqtında tınç yaşağan ealini qorçalav aqqında şartnameniñ ciddiy bozulmasıdır. Qabaatlanğan adamlarnıñ areketlerini devlet hainligi ve evelden añlaşıp, gruppa tarafından cinayet yapıluv, cenk adetlerini ve ev toqunmazlığını bozması olaraq tanıdılar", — dep QMC prokurorlığı hulâsa çıqardı.
Uquq qorçalayıcılar, qabaatlanğan adamlarnıñ adlarını bildirmediler, amma öz menbalarından Suspilne Qırım ögrendi ki, Tişın İhor İhorovıç, Sağayda Oleksandr Serhiyovıç ve Tütünik Artem Valentınovıç aqqında laf etemiz.
Telegram ve Facebookta Suspilne Qırım haberlerine abune oluñız
