Ukraina Silâlı Quvetleri içün qırım göñüllileri "Kanük" dronını işlep çıqardılar. Asrkerlerniñ göñüllilerge dronlar alması talapları onı meydanğa ketirmege ilham berdiler. O, katapultadan uçurıla ve azamiy tezligi 300 km/st, ağır patlayıcı da taşıya bile.
"Kanük" uçucısız aletini meydanğa ketirmek fikriniñ müelliflerinden biri, "Qırım faaliyeti" CTnıñ başı Ruslan Jadnov bu aqqında haber berdi.
Onıñ sözlerine köre, göñülliler dronnı temelden meydanğa ketirdiler. Onı işlep çıqarğanda internetteki videolarnı baqtılar ve rus "Orlan" uçucısız aletiniñ içini ögrendiler. Ukrain askerleri onı tutılar ve göñüllilerge berdiler. Endi cebede bu dron qullanıldı.
"Kanük", rus tilinde "sarıç" adlı kiyik quşnıñ adına adlandırıldı. Bundan başqa, Qırımda Sarıç burnu bar.
Dron işlep çıqarıcılardan biri Andriy Brühanov bildirdi ki, o katapultadan uçurıla, bundan soñ kamera ve aydayıcı cihaz vastasınen operator onı ayday. Ücüm vaqtında uçucısız aletniñ azamiy tezligi 300 km/st, RPGden ağır patlayıcı da taşıya bile. "Kanük"niñ ağırlığı ise 10-12 kg.
"Ayta bilemiz ki, onıñ imtiyazı tezligi ve uzaqlığıdır. Misal olaraq, onı küçük dronlarnen beñzetseñiz, daa ağır patlayıcı taşıya bile", — dep qayd etti o.
"Kanük"niñ uçuş uzunlığı 70 km. Dron o qadar paalı olmay, onıñ fiyatı 5 biñ dollardır. Göñülliler para toplaylar. Malzemeler mevcut olsa, onı işlep çıqarmaq içün bir afta kerekir.
"Birinciden bizim esas maqsadımız, cenübiy cebedeki askerlere yardım etmektir, çünki biz Qırımdan kelemiz. Elbette, muvafaqiyet olmasını işteyiz. O yerge, em de şarqqa yollamağa tırışa edik... Ve bizim maqsadımız, Qırımnıñ er bir yerine uçacak don işlep çıqarmaqtır", — dep Jadnov añlattı.
Umumen "Qırım faaliyeti" cemaat teşkilâtı cebege tahminen on dron yolladı. Olarnıñ Herson tarafındaki askerlerden (terkibinde çoq Qırımdan kelgen insan hızmet etken deñiz ordusınıñ 36. taqımından) müsbet sözler aldılar.
Telegram ve Facebookta Suspilne Qırım haberlerine abune oluñız
