UTH Rusiyeniñ arqasında, şu cümleden işğal etilgen Qırımda, mahsus operatsiyalarını devam etmege planlaştıra. Prioritetli maqsatları arasında: rus arbiy gemileri, silâ logostika koridorları, arbiy bazalar. Bundan ğayrı, Qırım köprü ve RF Qaradeñiz flotunıñ bir qaç gemisini bozğan Sea Baby deñiz uçucısız aletleri vastasınen Qara deñizde çalışmağa devam etecek.
UTHniñ başı Vasıl Malük Politicoğa intervyu bergende bu aqqında haber berdi.
“Öz planlarımıznı añlatamamız. Duşman içün olar şok olmalı. Sürpriz azırlanamız. İşğalciler, saqlanamaycaqlarını añlamalılar. Duşmannı er bir yerde tapacaqmız… Biz er vaqıt yañı yollarnı tapamız. Demek ki, pamuq yanmağa devam etecek”, - dep qayd etti o.
Malükniñ sözlerine köre UTH Rusiyeniñ qalbine doğru ine saplayaraq, ücüm ete.
“Er bir operatsiyamıznıñ muayyen maqsadı ve neticesi bar. Umumen bu, Rusiye Federatsiyasınıñ cenkleşmek qabiliyetini qıyınlaştıra ve bizim ğalebemizni yaqınlaştıra”, - dep qoştı o.
Telükesizlik hızmetiniñ başı qayd etti ki, UTH Sea Baby deñiz uçucısız aletleri vastasınen Qara deñizde çalışmağa devam etecek. Olar vastasınen Ukraina, RF Qaradeñiz flotunı işğal etilgen Qırımdan yavaş-yavaş çıqara.
“Eşitkenleriñiz UTHniñ bütün operatsiyaları, tek bizim işimiz ve bizim yekâne tehnikiy işlenmemizdir. Bu operatsiyalar mümkün oldı, çünki bizim tehnikiy qararlarımıznı tüşünip çıqaramız”, - dep Malük qayd etti.
Bundan ğayrı o hatırlattı ki, UTHniñ eñ çoq operatsiayasını keçirgeni Qırım, Donbas ve Qara deñiz, Ukrainanıñ toprağıdır.
“Bu, bizim toprağımızdır, ve onı işğalcilerden azat etmek içün mümkün olacaq bütün usullarnı qullanacaqmız”, - dep Malük bildirdi.
Telegram, Viber ve Facebookta Suspilne Qırım haberlerine abune oluñız
