11 senege maküm etilgen islâm ilimleri magistri ve arap tilşınası Vadım Bektemirovnı Sankt-Peterburgdaki 2. tüzetici müstemlekede taptılar. Eki ay aqrabaları, onıñ Lıpetsk vilâyetindeki Yelts şeeriniñ apishanesinden etap etilmesi aqqında haber alğan soñ qayda olğanını bilmey ediler.
Kreml eseriniñ apayı Lemara Bektemirova "Qırım birdemligi"ne tefsir etkende bunı añlattı.
"Ailesi, müstemlekeniñ reberi Konstântın Bubnovdan haber aldı. Berim ayınıñ 21-inde Vadımnı Lıpetsk vilâyetindeki Yelts şeeriniñ apishanesinden etap etkenleri belli oldı, amma tek boş aynıñ 20-sinde Bektemirovnıñ apayı, ceza müessisesiniñ memuriyetinden mektüp aldı. Onıñ kameradaşı, başqa siyasiy mabüs, Vladlen Abdulkadırov "Zonatelekom" vastasınen bunı apayına añlattı. Vadımnıñ ailesine, onıñ Yeltsten eap etecekleri aqqında haber bermediler", — dep bildirildi.
Qırımtatarnıñ apayınıñ sözlerine köre, aqayı qayda olğanını ögrenmek içün Rusiyedeki bir qaç müstemlekege em elektron, em de kâğıt mektüplerini yolladı. Amma olarğa ya cevap bermediler, ya da bu adam anda bulunmayanını aytıp cevap berdiler.
Aynı zamanda Lemaranıñ hitabına, Rusiye FSVP cevap berdi ki, apishanede ve taqiqat izolâtorlarında bulunğan ve ceza alğan insanlarnıñ şahsiy bilgileriniñ "merkezleştirilgen sicili yoq". Bektemirov ise ailesinen alâ daa bağlanmadı.
Vadım Bektemirov aqqında ne bilemiz
- Vadım Bektemirov, arap edebiyatı ve gumanitar ilimler bölüginiñ "İslâm oquvları" ihtisasında magistrdir. Tevqif olunmadan evel siyasiy mabüslerniñ ailelerini destek etmek içün dua ete, epis etilgen qırımtatar musulmanlarına posılkalarnı yollamağa yardım ete, siyasiy sebepli davalarnıñ oturışlarına bara edi.
- 2020 senesi oraq ayınıñ 7-sinde Qırımdaki kütleviy tintüvlerden soñ Bektemirov tutuldı. O, 2003 senesinden başlap Rusiyede yasaqlanğan "Hizb ut-Tahrir"niñ faaliyetinde iştirak etmekte qabaalandı.
- 2022 senesi kiçik aynıñ 11-inde Rusiyedeki Cenübiy bölge arbiy makemesi Vadım Bektemirovnı 11 senege maküm etti. Ceza müddetiniñ birinci üç senesini apishanede keçirecek edi. 2023 senesi çiçek ayınıñ 3-ğnde Vlasıstaki Apellâtsiya arbiy makemesi ükümini deñiştirmedi.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
