Qırım Ukrainalıları Bölge Şurası (QUBŞ), Qırım ukrainalıları ve karaimler (Ukrainanıñ tamır halqlarınıñ biri) içün 2024 ve 2025 senesi müim tarihlarnı devlet seviyesinde qayd etüvnen bağlı tekliflerini Gumanitar ve malümat siyaseti meseleleri eyyetine yolladı.
"Qırım Sesi" malümat agentligine bu teklifniñ teşebbüsçilerinden biri, QUBŞnıñ vekili Andriy Şçekun bunı añlattı.
"Qırım ukrainalılarınıñ Ukraina devlet siyasetinde rolü soñ derecede müimdir. Öz tekliflerinde Qırım Ukrainalıları Bölge Şurası, ukrain Qırımınıñ içtimaiy-siyasiy ayatında tarihiy adamlarnıñ faaliyetiniñ tarihiy müimligini añlata. Gumanitar ve malümat siyaseti meseleleri eyyetiniñ bergenimiz tekliflerni 2024 ve 2025 senesi devlet seviyesinde qayd etüvnen bağlı obyektivligine ümüt etemiz", – dep ayttı o.
Ukrainalılarnıñ Qırımda faaliyetine dair añma ve yıldönüm tarihlarına 63 tarih teklif etildi, olardan 29-ı 2024 senesi ve 34-ü 2025 senesi qayd etilir.
Karaimlerniñ içtimaiy-siyasiy ayatına dair añma ve yıldönüm tarihlarına doquz tarih teklif etildi, olardan yedisi kelecek sene ve ekisi 2025 senesi qayd etilir.
2024 senesi Qırım ukrainalıları içün böyle belli insanlarnıñ yıldönümini qayd etmege teklif eteler
- Yevhen Adamtsevıçnıñ 120. doğan künü – banduracı, ukrain halq tarihiy türküleriniñ mearetli icracısı, "Zaporijjâ marşı"nıñ müellifi. 1972 senesi boş aynıñ 19-ında Bağçasaray rayonındaki Hlomivtsi köyünde vefat etti, anda da defin olundı;
- Stepan Rudanskıynıñ 190. doğan künü – ukrain şairi, yarımadanıñ Cenübiy yalısınıñ sanitar ve liman ekimi, Yalta bölgesiniñ ürmetli dünya makemecisi, 1873 senesi mayıs ayınıñ 3-ünde vefat etti, anda da defin olundı;
- Petro Kılıçoknıñ 10. ölüm künü – V. İ. Vernadskıy adına TMUniñ professorı, Qırımnıñ ukrain medeniyetiniñ inkişafına müim isse içün S. Rudanskıy adına mükâfatınıñ laureatı (1991), Qırımda ukrain edebiyatşınaşığınıñ patriarhı;
- Ukraina qaramanı Oleksandr Korpannıñ 30. doğğan künü – 2022 senesi saban ayınıñ 2-sinde arbiy uçuştan qaytqanda Aqyarlı elâk oldı.
2024 senesi karaimler içün böyle belli insanlarnıñ yıldönümini qayd etmege teklif eteler
- Avraam Firkovıçnıñ 150. ölüm künü – qadimiy kitaplar, elyazmalar ve tabutyazmalar toplamına, şu cümleden Eski Ahtnıñ Qırım elyazmasına, samiriler elyazmalarına ve arap ve fars elyazmalarına saip olğan karaim gazzanı, yazıcısı, atiqiytaçısıdır. Lutskta doğğan adam, Bağçasaray rayonınıñ Yosafat vadiyindeki karaimlerniñ soy mezarlığınıñ eñ qadimiy abidelerini açtı ve araştırdı. Çufut Qaledeki eski karaim mezarlığında defin olundı.
- İllâ Neymannıñ (Kruhlevıç) 65. ölüm künü – Mıkolayivde doğğan karaim aslı alim, uquqçı, oca, ülkeşınastır. Kezlevdeki karaim diniy oquv yurtunda ders alıp bergen edi. Kefede baş gazzan edi. Ukrainanıñ tamır halqlarınıñ sürgünligi ve alimlerde qarşı repressiyalar sebebinden basılmağan "Karaimler aqqında edebiyatınıñ sistematik köstergiçi"niñ müellifidir.
QUBŞ aqqında ne bilemiz
Qırım Ukrainalıları Bölge Şurası, Qırım ukrainalılarnıñ milliy öz-özüni idare etüv institutıdır. Olarnıñ esas vazifesi: yarımadadaki ukrainalılarnıñ aaqları ve menfaatını birleştirmek ve qorçalamaq, Ukrainanıñ topraq bütünligini qaytarmağa yardım etmektir.
Telegram, Viber ve Facebookta Suspilne Qırım haberlerine abune oluñız
