Kıyivde qırımtatar örneginen qalqan şeklindeki keramik pannonen "Qalqan" sergisi taqdim etildi. O, yañıdan yaratıluv, özüni identifikatsiya, adaletsizlikke qarşılıq, ayatnı qorçalav ve devam ettirüvniñ timsalidir.
Suspilne Qırım mühbiri bu aqqında haber berdi.
Ukrainadaki Litvaniya Cumhuriyeti Elçiliginiñ uzurında NATO malümat ve vesiqalar merkezinde qırımtatar keramikacısı Rustem Skibinniñ sergisi açıldı.
Edebiy obraz yaratmaq içün küreş sanatınıñ qısımlarından birini — Asker ve Ukraina Devletini keniş añlamında qorçalağan "Arbiy qalqan" saylandı.
Tahminen 200 sene evel aneksiya devrinde Rusiye, qalqanlarnı yaraştırğan qırımtatarlarnıñ ananeviy dekorını yasaqladı.
Musafirler, ustanıñ birinci dört pannosını kördiler. Ay devamında serginiñ daa üç parçası açılacaqtır. İstegen er kes, berim ayınıñ soñunda Kıyiv resim gallereyasında keramikacınıñ bütün 16 qalqanını köre bilir.
Er bir qalqannıñ öz manalı örnegi bar. Misal olaraq, lâle, adam ve askerniñ timsalidir. Oña Skıbin, Ukraina devletliginiñ tuğrası vetimsali olaraq qırımtatar Tamğasını qoştı.
"Qırımtatar dünyasında "Qalqan", qorçalav timsalidir. Bu, öz ülkesini qorçalamaq ıntıluvıdır. Bu qırımtatar dekorınen örnekli qalqanlar, bizim medeniyetimizde deyerli 200 senedir qullanılmağan arbiy silâdan yapıldı", — dep serginiñ müellifi añlattı.
Bundan ğayrı o, taqdim etilgen işlerini "sanat kamuflâji" olaraq adlandırdı.
"Bu, bizge kim olğanmıznı añlatqan özümizni identifikatsiyamızdır — biz qırımtatarlarmız!", — dep Skıbin qayd etti.
Usta qoştı ki, onıñ maqsadı, öz halqınıñ tarihiy mirasını yañıdan yaratmaq ve kelecek nesillerge onı bermektir.
"Bu qalqanğa berilgen manalarğa köre, sergige berilgen ğayege köre bu, bizge daa çoq ilham bere. Bütün dünyada bunı köstermek, Qırımnıñ Ukraina olğanını añlatmaq kerek", — dep Ukraina Prezidentiniñ Qırım MCdeki daimi vekili Tamila Taşeva qayd etti.
Qırımtatar aktöri ve rejissöri Ahtem Seitablaev, bu serginiñ öz añlamını añlattı.
"O sebepsiz keramiktir, yani olar, öz vastasız vazifesini — öldürici aletlerden qorçalamaq vazifesini yapmamalılar. Bu, bir hatırlatma, mecazdır", — dep qayd etti o.
Telegram, Viber ve Facebookta Suspilne Qırım haberlerine abune oluñız
