İşğalciler, Yalta rayonındaki Qızıltaş qasabasından belli olmağan yerge eki qırımtatar adamını tutıp ketirdiler. Qırımtatar siyasiy mabüsi Refat Alimovnıñ qız qardaşınıñ aqayı olğan Emil Nazarbekov ve bu sene baar mevsiminde yedi senelik tevqiften soñ müstemlekeden çıqqan Arsen Cepparov aqqında laf etemiz.
"Qırım birdemligi" bu aqqında haber berdi.
"Saat ekide Emil Nazarbekovnı evge ketirdiler. Yedi politsiyacı bar edi - üçü maskalarnen ve dörtü maskasız ediler. Daa eki şaat bar edi. Taqiqat areketleri aqqında protokolnı tek Emilge oqudılar. Quvetçiler, odalarnı baqmağa kettiler. Er bir dolapqa baqtılar - bildirdiler ki, narkotikler ya da silâ qıdıralar. Bundan soñ qırımtatar adamını protokolnı imzalamağa mecbur ettiler ve belli olmağan yerge ketirdiler. Qaysı bölükke ketirgenlerini aytmadılar, çünki sanki "yerli olmağanlar"dır", - dep bildirildi.
Qırımtatar adamınıñ ailesi, onı ayda tutqanlarını bilmey.
Aynı zamanda saat 15:00te yerli tükân yanında sabıq siyasiy mabüs Arsen Cepparovnı tuttılar.
"Onıñ yanına maşna keldi. Arsenni alıp, topraqqa tüşürdiler ve başına silâ dayadıalr. Quvetçiler, episiniñ videosını çıqardılar, bundan soñ ise Cepparovnı maşnağa mindirdiler. Arsenniñ şu anda qayda olğanını belli olmay", - dep bildirildi.
Arsen Cepparov aqqında ne bilemiz
- 2016 senesi çiçek ayınıñ 18-inde Arsen Cepparovnı tuttılar. Tevqiften bir ay evel işdeşlik yapması içün onıñ işine FSB işçileri keldiler. Red etse, cinaiy dava açmağa qorqutırlar.
- FSBnen işdeşlik yapmağa red etkeni içün onı işten çıqardılar. Yalta şeerinde qara yolda FSB işçileri Cepparovnı tutıp, onı aqlarından marum ettiler.
- 2016 senesi çiçek ayınıñ 18-inde Yalta rayonındaki Qızıltaş köyünde qırımtatar Arsen Cepparov ve Refat Alimovnıñ evlerini tinttiler. Birazdan eki ay evel tutulğam Muslim Aliyev, Enver Bekirov ve Vadım Siruknıñ cinaiy davasınen olarnıñ davalarını birleştirdiler. Uquq qorçalayıcılar olarnı Hizb ut-Tahrir davasında "Yalta gruppası" olaraq adlandırdılar — coğrafiya printsipine köre.
- 2019 senesi Rostov-na-Donudaki Cenübiy bölge arbiy makemesi Cepparovnı terrorcılıq teşkilâtında iştirak etüv madddesine (RF CQniñ 205.5. maddesiniñ ekinci qısmı) mücibi 7 senege maküm etti. Adam, qabaatını tanımadı. Salavattaki başqır IK-16da ceza aldı. Cepparovnıñ sağlığı zayıflaştı ve 20 kilogram berdi. Onı ŞİZOğa bir qaç ayğa yollar ediler.
- 2023 senesi çiçek ayınıñ 17-sinde "Hizb ut-Tahrirniñ Yalta davasında" 7 senege maküm etilgen Cepparovnıñ ceza müddeti bitti. Salavatta müstemleke qapısı ögünde advokatı Edem Semedlâev onı bekledi.
- Çiçek ayınıñ 19-ında Aqmescit rayonındaki camilerden birinde faalciler, siyasiy mabüs Arsen Cepparov ve onıñ evge qaytmasınen hayırlamağa kelgen Qırım sakinleri içün iftar keçirdiler.
023 senesi berim ayınıñ 7-sinde kommunizmlaştıruv ve Qırımnıñ yañı rayon bölünmesini kirsetüvnen bağlı "Ukrainanıñ bazı qanun çıqarıcı aktlarına Qırım MCniñ memuriy-topraq tarzınen bağlı ayrı meselelerni çezmege dair deñişmelerni kirsetüv aqqında" qanun aqqını qazandı. 14 rayon yerinde yarımadada yañı 10 rayon peyda oldı: Bağçasaray, Qarasuvbazar, Canköy, Kezlev, Keriç, Qurman, Or Qapı, Aqmescit, Kefe ve Yalta rayonları.
Telegram, Viber ve Facebookta Suspilne Qırım haberlerine abune oluñız
