Eki ay evel oraq ayınıñ soñunda Ukraina Ava quvetleri, Odesa vilâyetiniñ astyapısına ücüm etmeleri içün iran dornlarınıñ "Çauda" arbiy poligonından fırlamalarını ilk kere qayd etti.
Oraq ayından berli Keçir yarımadasınıñ cenüp-şarqiy yalısındaki poligon, dronlarnıñ eñ az 14 ava telükesi vaqtında qullanılır. Ukrainanıñ cenübini ücüm etmek içün Rusiyedeki Prımorsk-Ahtarsktan fırlatmalarnen aynı zamanda o yerden olarnı fırlatırlar. "Çauda"dan mesafesi de daa qısqadır.
Ukraina Ava quvetleri, ruslarnıñ "şahed"lerni istisalini artırğanını qayd eteler ve tüşüneler ki, yaqın kelecekteki ava ücümleri vaqtında olar, esas çağıruv olacaqlar.
"Rusiye, toprağında istisalini arttırır, bunıñ içün tamam dron-kamikadzeler, bu qış ve küz mevsimlerinde bizim mudafaa quvetlerimiz içün daa qıyın mesele olurlar, — dep USQniñ Ava quvetleriniñ nutuqçısı Yuriy İgnat, Suspilne Qırımğa tefsir etkende qayd etti. — Fırlatmalar aqqında, yazıq ki, er zaman vaqtında degil, malümat alamız, amma soñunda, şu cümleden, ortaqlarımızdan da, onı ögenemiz.
USQniñ Baş ştabınıñ sabıq nutuqçısı Vladıslav Seleznövniñ sözlerine köre, işğal devrinden evel Ukraina Ava quvetleri, "Çauda" poligonını qullanılğan edi. Şu cümleden, anda sıq sıq ava mudafaası quvetleriniñ oquvları keçirilgen ediler.
Qırım zapt etilgen soñ anda ruslar, öz Ava mudafaası sistemasınıñ bölügini yerleştirdiler. Şimdi ise dron-kamikadzelerni fırlatmaq içün bir meydançıq azırladılar.
"Bu, arbiy poligon toprağıdır, çünki bizim közlerimiz ve Qırım topraqlarında çalışqan bizim istihbaratımız tarafından qorçalanır ve mudafaa etilir. Tamam bu arbiy obyektke kirmek pek zor", — dep USQniñ ADQniñ yedek polkovniki Vladıslav Seleznöv qayd etti.
Bozarğan aynıñ birinden berli Çauda burnu, vatadaşlar içün qapalıdır. Qırımnıñ işğal akimiyetiniñ resmiy bildirmesinde qayd etildi ki, anda uçaq ücüm alteleriniñ qullanılmasınen deñev işleri keçirilir. Vladıslav Seleznöv ayttı ki, coğrafiya ceetinden Mudafaa quvetleriniñ saip olğanları aletlernen o yerge irişmek içün bu poligon pek uzak yerleşe. Aynı zamanda ruslar, mümkün olacaq ücümlerden qaçınaraq, fırlatma meydançıqlarını er vaqıt deñiştire bilirler.
"Fırlatma meydançığınıñ qaysı yerde olğanını ögrenmek içün bunı yerde teşkermek kerek ve başqa insanlar içün o topraq qapalı olsa, pek qorçalansa, yerni istihbarat etmek kerek. Elbette bu şartlarda istihbarat içün vaziyetniñ qıyınlığı artar", — dep Vladıslav Seleznöv qayd etti.
Yuriy İgnatnıñ sözlerine köre, Ukraina F-16 uçaqlarını alacaq soñ, işğal etilgen Qırımnıñ er bir yerindeki duşman obyektine irişe bilir.
"Olarnı uzaqlıqqa quvmaq içün bizge F-16 uçağı ya da başqa türlü alet kerek. O zaman Qırımğa daa yaqın ücümlerni yapa bilirmiz ve elbette bu, duşmannıñ logistikasını yoq etmege imkân berecek. Bu da, ukrain ordusınıñ muvafaqiyetini temin etecektir", — dep USQniñ Ava quvetleriniñ nutuqçısı qayd etti.
Telegram, Viber ve Facebookta Suspilne Qırım haberlerine abune oluñız
