2025 senesiniñ birinci kvartalında vaqtınca işğal etilgen Qırımda adaletli mahkeme aqqınıñ bozuluvı boyunca eñ az 70 adise qayd etildi, olardan 39-ı — tamır Qırımtatar halqınıñ vekillerinen bağlı.
Bu malümatnı Qırımtatar Maaliy Merkezi 2025 senesiniñ birinci kvartalı devamında işğal etilgen Qırımda insan aqlarınıñ bozuluvı talilinde aydınlattı.
Teñeştirmek içün, 2024 senesiniñ aynı müddetinde 82 ve 2023 senesi 94 adise qayd etildi. Bu raqamlar biraz eksilse de, uquq qorçalayıcılar qayd ettiler ki, repressiya areketleri sistematik olaraq qala.
Berilgen malümatqa köre, bu müddet devamında yañı apis cezaları, apis müddetleriniñ uzatılması ve mahkeme qararlarınıñ çıqarılması devam etti, advokatlarnıñ şikâyetleri red etildi ve para cezaları berildi.
Bundan da ğayrı, Qırım uquq qorçalayıcı gruppasınıñ monitoringine köre, işğal etilgen Qırımda Rusiye ordusında hızmet etmekten vazgeçkenleri içün cinaiy taqip devam ete. 2025 senesiniñ ilk üç ayı devamında Rusiye mahkemeleri eñ az 23 böyle cinaiy davanı baqtı.
Şu cümleden, 23 davadan 18-i birinci instantsiya mahkemelerinde qabaatlav qararınen yekünlendi, bir apellâtsiya qararı ükümni devam ettirdi, 4 dava daa baqıla.
"Rusiye Qırım sakinlerini Ukrayinağa qarşı büyük cenkte qullana. RF Silâlı quvetlerine hızmet etmege mecbur etmek maqsadınen işğalli akimiyet RF Ceza qanunnamesiniñ 328-inci maddesine istinaden (RF Silâlı quvetlerinde hızmet etmekten vazgeçüv) böyle hızmetten vazgeçüv içün cinaiy taqip qullana", — dep QMM bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
