Özbekistanda Parlamentlerara Birligi Assambleyasınıñ meydanında Ukraina parlament delegatsiyası cenk vaqtında medeniyet ve diniy serbestlikniñ qoruvı müim olğanına diqqat çekmek içün "Ukraina medeniy mirası ve kimligi" adlı yan tedbir keçirdi. Qırımtatar halqınıñ milliy kimliginiñ saqlanuvında rolüne ayrı diqqat ayırıldı.
Ukraina halq mebusı Tamila Taşeva bunı bildirdi.
Tedbirge Zambiya, Çili, Türkiye, İtaliya, Büyük Britaniya, Latviya, Kanada, Norvegiya, Belçika, Lehistan, Danimarka, İsviçre ve diger memleketlerniñ vekilleri qoşuldı.
"Medeniyet — halqara tildir, onıñ yardımınen halqlar özara añlaşa ve işanç qura. Bu sebepten bizler ukrain medeniyeti aqqında aytmaq ve tarihımıznı paylaşmaq kerekmiz", — dep Tamila Taşeva qayd etti.
Tedbirniñ esas mevzusı, Rusiye işğali şaraitinde medeniy mirasnıñ saqlanuvı ve diniy serbestlikniñ qoruvı oldı. Sergi qısmında qırımtatar medeniyetiniñ unikal artefaktları taqdim etildi: ev eşyaları, Örnek, dua kilimleri, cezveler, keramika ve 1944 senesi sürgünlik vaqtında qırımtatarlarnıñ saqlağanları nadir Quranlar toplamı.
"Medeniy mirasnıñ saqlanması — tek keçmiş aqqında degil, aynı zamanda onıñ itibarı ve kelecegi aqqında da. Eñ qaranlıq vaqıtlarda bile medeniyet, iman ve birdemlik bizim tayançımız olıp qala", — dep munaqaşa devamında Taşeva qayd etti.
Aynı zamanda "Serbest Qırımğa mektüpler" teşebbüsiniñ mahsus lokatsiyası bar edi, anda iştirakçiler Qırımda qanunsız tutulğan ya da Rusiyege sürgün etilgen ukrain siyasiy mabüslerine qol tutuv mektüplerini yazmaq mümkün edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
