İşğal etilgen Qırımda saban ayında adaletli makeme aqqınıñ 31 bozuluvı qayd etildi, olardan 11-i qırımtatarlarnen bağlı. Aynı bu müddet devamında Anatoliy Kobzar ğayıp oldı, ertesi künü ise işğalciler evine kelip, ukrain vesiqalarını aldılar.
Qırımtatar maaliy merkezi (QMM) işğal etilgen Qırımda insan aqlarınıñ bozuluvı talilinde bunı bildirdi.
"Haber etilgen müddet devamında apis cezalarınıñ uzatılması, makeme ükümleri ve yañı apis cezalarınıñ uzatılmasından ğayrı, advokatlarnıñ istinaf şikâyetleriniñ red etilüvi ve para cezalarınıñ berilüvi qayd etildi", — dep QMMniñ esabatında aytıla.
Uquq qorçalayıcı teşkilâtnıñ malümatına köre, saban ayında aşağıdaki bozuvlar qayd etildi:
- yedi tintüv, olardan biri — qırımtatarlarnıñ evinde;
- 20 yaqalandı ya da tutuldı, beşi qırımtatarlarğa nisbeten;
- 20 sorğu, sorav ve "subet", beşi qırımtatarlarnen bağlı;
- 23 apiske alındı, olardan yedisi qırımtatar.
Bundan ğayrı, altı kere beden ve aqıl sağlığınıñ yüksek seviyesine aqqınıñ bozuluvı qayd etildi, üç kere qırımtatarlarğa nisbeten. Bir ay devamında bu aq Qırım siyasiy mabüsleri Ruslan Mesutov, Serğiy Tsığipa, Oleksandr Sizikov, Nasrulla Seydaliyeva, İrına Danılovıç ve Appaz Kurtamet içün bozulğan edi.
Uquq qorçalayıcılar: "Böyle bozuluvlar siyasiy mabüslerniñ sağlıq alı fenalaşqanınen bağlı, advokatlarnıñ ve mabüslerniñ qasevetlerine emiyet berilmey, olarğa kerekli tibbiy yardım kösterilmey", — dep yazdılar.
Bir ay içinde bir insan ğayıp oldı, dep QMM bildirdi. Saban ayınıñ 5-nde Anatoliy Kobzar Bağçasarayğa işke ketti, amma evge qaytmadı. Ertesi künü evi tintildi, ukrain vesiqaları alındı, amma adamnıñ qorantası bulunğan yeri aqqında bir şey aytmadı.
Aynı vaqıtta saban ayında belli oldı ki, kiçik ayda Rusiyeniñ Ulyanovsk vilâyetindeki Dmitrovgrad apishanesinde 60 yaşındaki siyasiy mabüs, Gençesk rayonınıñ Rıkove köyünden qırımtatar Rustem Virati vefat etti, onı işğalciler "Noman Çelebicihan adına qırımtatar göñülli batalyonında iştirak etkeni"nde ve "Qırımnıñ iqtisadiy qamaçavına qoltutqanı"nda qabaatlay ediler.
Bundan ğayrı, talilde Herson ve Zaporijjâ vilâyetlerinde saban ayında insan aqları bozuluvları aqqında malümat bar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
