Çiçek ayınıñ 4-nde Ukraina Nazirler Kabineti qırımtatar tiliniñ latin urufatına esaslanğan imlâsını resmen tasdıqladı. Vesiqa, tilniñ fonetik hususiyetlerini köz ögüne alıp, imlâ ve punktuatsiya qaidelerini belgiley.
Qırımtatar Milliy Meclisiniñ reisi Refat Çubarov bunı bildirdi.
İmlâ, qırımtatar tiliniñ latin urufatına esaslanğan elifbesini tasdıqlağan 2021 senesi ilk küz ayınıñ 22-nde qabul etilgen Nazirler Kabinetiniñ qararına köre işlep çıqarıldı. Vesiqanıñ leyhası 2024 senesi boş aynıñ 4-nde Qırımtatar tili meseleleri milliy eyyeti tarafından evelden tasdıqlanğan edi.
Metin üzerinde işte Qırımtatar Milliy Meclisi, Ukraina Prezidentiniñ Qırım Muhtar Cumhuriyetindeki Daimiy Temsilciligi, Ukraina Qavmiy siyaset ve vicdan serbestligi meseleleri boyunca devlet hızmetiniñ vekilleri, em de ukrain institutlarınıñ alimleri iştirak ettiler.
"Qırımtatar tili meseleleri milliy eyyeti imlâ üzerinde işni idare ete edi (başları — İ. Vereşçuk, T. Taşeva, R. Çubarov), onıñ teşkil etilmesi ise Qırımtatar Milliy Meclisi, Ukraina tasil ve ilim nazirligi, Ukraina Milliy ilimler akademiyasınıñ O. O. Potebnıy adına Tilşınaslıq institutı, Taras Şevçenko adına Kıyiv milliy universitetinen işbirlikte Qavmiy siyaset ve vicdan serbestligi meseleleri boyunca Ukraina Devlet hızmetine berildi", — dep Refat Çubarov qayd etti.
Vesiqa azırlanğanda qırımtatar tilinde yazılışnıñ XIII asırdan bugünge qadar inkişafınıñ hususiyetleri, şu cümleden arap urufatından kiril urufatına keçüv ve 1990 seneleri latin urufatınıñ ğayrıdan tiklenüv ıntıluvları köz ögüne alındı.
"Amma latin urufatına esaslanğan qırımtatar elifbesiniñ qırımtatar milliy Qurultayınıñ delegatları tarafından tasdıqlanğan şeklinde resmen tasdıqlanmasına daa on bir yıl kerek oldı: 2021 senesi ilk küz ayınıñ 22-nde Ukraina Nazirler Kabineti "Qırımtatar tili elifbesiniñ tasdıqlanuvı aqqında" qararını tasdıqladı", — dep Çubarov bildirdi.
Yañı imlâ qararı 2022-2032 seneleri qırımtatar tiliniñ inkişaf strategiyası ve 2023 senesi oraq ayınıñ 28-nde qırımtatar tiliniñ standartı aqqında ükümet emrini yerine ketirüvniñ bir qısmıdır.
"Böyleliknen, 2022 senesi kiçik aynıñ 23-nde Ukraina Nazirler Kabineti tarafından tasdıqlanğan 2022-2032 seneleri Qırımtatar tiliniñ inkişafı strategiyasında ve 2023 senesi oraq ayınıñ 28-nde Ukraina Nazirler Kabinetiniñ "Qırımtatar tiliniñ imlâsını işlep çıqaruv meselesi" buyruğında qırımtatar halqınıñ, Ukraina tamır halqı olaraq, öz til haslığını saqlap qalmaq ve inkişaf ettirmek aqqınıñ yerine ketirilmesini temin etmek maqsadınen belgilengen müim vazifelerden biri yerine ketirildi", — dep Meclis reisi qoştı.
İmlâ tasdıqlanğan soñ onı tasil, media, resmiy iş ve qırımtatar tili qullanılğan diger saalarda ket-kete kirsetmege planlaştırıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
