Kıyivdeki Şevçenko rayon makemesi, aqayını ukrain qadınlarınıñ namusına keçmege çağırğan rusiye işğalcisiniñ apayını, cenk qanunlarını ve adetlerini bozğanında qabaatladı. O, Rusiye Federatsiyasınıñ arbiyleri ile beraber Qırım işğal etilgen soñ yarımadağa yaşamağa ketti.
"Shemı" neşiri bunı bildirdi.
Qayd etilgenine köre, aqay-apay 2022 senesi Ukraina Baş istihbarat idaresi olarnıñ telefon subetini aydınlatqan soñ belli oldı. Mında qadın o vaqıt Herson vilâyetinde bulunğan aqayını ukrain qadınlarınıñ namusına keçmege çağırğan edi.
O vaqıt Herson vilâyetinde ukrainlerge qarşı zorbalıq adiseleri Ukrainanıñ diger bölgelerinden daa çoq edi. Bazıları aylarnen devam ete edi, bazı Rusiye işğalcileri balalarğa qarşı yapılğan cınsiy zorbalıqnıñ bir qaç adisesinde iştirak ete ediler.
Telefon subetinden soñ jurnalistler subet iştirakçileriniñ şahsiyetlerini tez bir zamanda taptılar. Qırım işğal etilgen soñ, aqay-apay qanunsız sürette Rusiye Federatsiyasınıñ Orlov vilâyetinden yarımadağa köçkenleri belli oldı. Adam, ğaliba, Qırım işğali vaqtında iştirak etken desantçılarnen hızmet etken edi, ve endi dört yıl içinde bütün qorantasını işğal etilgen topraqqa alıp ketti.
Davanıñ taqiqatçılarınıñ aytqanları kibi, qadınnıñ aytqanları "Ukraina cemiyetine qarşı şahsiy nefretine ve ukrain qadınlarına sayğısızlığı"na esaslana. Neticesinde Şevçenko rayon makemesi onı beş yılğa apishanege yolladı. Bundan da ğayrı, o, halqara qıdıruvğa ilân etildi.
Qırım MC ve Aqyar şeeriniñ prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Hatırlatamız ki, vaqtınca işğal etilgen Qırım sakinine Rusiye ordusına yardım etkeni aqqında şübe bildirdiler. O, Zaporizjjâ, Herson ve Ukrainanıñ diger vilâyetlerinde cenkleşken Rusiye Federatsiyasınıñ arbiyleri içün para toplav ve yardımnı teşkil ete edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
