Norvegiya işğal etilgen Qırımda qırımtatarlarğa qarşı repressiyalar aqqında tafsilâtlı maruza azırlaycaq, em de Yuqarı Şura ve Meclisniñ 1944 senesi sürgünliginiñ genotsid olaraq tanınması aqqında çağıruvını baqacaq.
Qırımtatar Milliy Meclisiniñ reisi Refat Çubarov Norvegiyanıñ tış işler naziri Espen Barta Eyde, emek ve içtimaiy integratsiya naziri Tonye Brenna ile körüşken soñ bunı bildirdi.
Qırımtatar Milliy Meclisiniñ reisi Refat Çubarov Ukraina tış işler naziri Andriy Sıbiğanıñ Norvegiya zenaatdaşlarınen körüşüvinde iştirak etti. Esas diqqat işğal etilgen Qırımdaki vaziyetke ve qırımtatar halqınıñ vaziyetine ayırıldı.
"Ukraina tış işler naziri Andriy Sıbiğanıñ davetinen 2025 senesi saban ayınıñ 26-nda Norvegiya tış işler naziri Espen Barta Eyde ve Norvegiya emek ve içtimaiy integratsiya naziri Tonya Brenna ile onıñ iş körüşüvinde iştirak ettim", — dep Çubarov qayd etti.
Onıñ aytqanına köre, Norvegiya tış işler naziri, eyyetniñ Ukraina ziyaretiniñ neticeleri parlament içün maruza olaraq resmiyleştirilecek, dep işandırdı.
"Norvegiya tış işler naziri qırımtatar halqınıñ repressiyaları ve taqiplerine ayrı diqqat ayırılacağına ve Yuqarı Şura ve Meclisniñ 1944 senesiniñ sürgünligini genotsid olaraq tanımağa çağıruvına eminlik berdi", — dep Çubarov bildirdi.
Bundan da ğayrı, norvegiya memurları qırımtatarlarnıñ temsiliy organları Qurultay ve Meclisnen meraqlana ediler. Çubarov, Norvegiyanıñ tamır halqını temsil etken Saam parlamentinen qıyasladı.
"Qırımtatar halqınıñ öz-özüni idare etüv institutlarınıñ qurulması, Ukraina devletinen işbirlik aqqında aytqanda, men Norvegiyanıñ Saam parlamentinen paralel keçirdim", — dep qayd etti o.
Meclis adından Çubarov Norvegiya Ukraina topraq bütünligine qol tutqanı ve arbiy yardım köstergeni içün teşekkür bildirdi.
Telegram, WhatsApp ve Facebookta Suspilne Qırım haberlerine abune oluñız
