Ukraina tış işler nazirligi, saban ayınıñ 27-28 künleri işğal etilgen Qırımda keçirilecek "halqara ilmiy-diplomatik kongress"niñ Rusiye tarafından keçirilmesini takbih etti. O, 1945 senesi Yalta barışıq konferentsiyasınıñ 80 yıllığına bağışlandı. Ukraina, işğal etilgen topraqlarda bunıñ kibi teşviqat tedbirlerinde iştirak etken bütün ecnebiy vatandaşlarnıñ malümatlarını da qayd ete.
Tış işler nazirliginiñ spikeri Ğeorgiy Tıhıy saban ayınıñ 27-ndeki brifing devamında bunı bildirdi.
Onıñ aytqanına köre, bu tedbir — Kremlniñ yarımada işğaline aqlamağa, tarihnı yañıdan yazmağa, Ekinci cian cenkinde natsizm üzerinde ğalebeni öz başına almağa daa bir ıntıluvıdır. Buña "Rusiye tarafından halqara uquqnıñ qaideleriniñ ve printsipleriniñ daa bir bozuluvı" dedi.
"Rusiye, tarihiy Yalta konferentsiyasınıñ iştirakçileriniñ soylarını qullanıp, olarnı bu tedbirge davet etip, özüni ittifaqdaş devletlerniñ yekâne mirasçısı olaraq ilân etmege tırışa ve sabıq SSCB toprağında qurulğan diger mustaqil devletlerniñ ğalebesine qoşqan issesini körmemezlikke ura. Mında, bu kontekstte, daa bir kere hatırlatamız ki, 2014 senesinden başlap Rusiye, hususan 1945 senesi Yaltada qurulğan dünya havfsızlıq mimarisini faal sürette yoq ete. Amma şunı da bilemiz ki, o vaqıt Yaltada, şu tarihiy konferentsiyada, liderler tesir saalarınıñ bölüvi aqqında añlaştılar ve, kerçekten de, Avropanıñ haritasını ayırdılar. Bugün Rusiye, ğaliba, aynısını istey", — dep qayd etti o.
Tış işler nazirliginiñ spikeri qayd etti ki, Ukraina ve onıñ ittifaqdaşlarınıñ strategik vazifesi — bu kibi dünyağa tesir saalarınıñ qaytmasına yol bermemektir.
Onıñ qayd etkenine köre, Ukraina bu ve bu kibi teşviqat tedbirlerinde iştirak etken bütün ecnebiy vatandaşlarnı nezaret ete, bu ise qanunsız işğalni qanuniyleştirmege ve Ukraina devletiniñ suverenitetini bozmağa yardım ete.
"Ukraina akimiyetiniñ izni olmadan vaqtınca işğal etilgen Ukraina topraqlarına barmaq — ukrain qanunlarınıñ qaba bozuluvıdır ve uquqiy mesüliyetke ve sanktsiyalarğa yol aça bile. İştirakçilerniñ cedvelleri ukrain tarafına belli. Ukraina Qırım yarımadasınıñ işğalden qurtarıluvı, Ukraina devleti ve vatandaşlarına qarşı yapılğan cinayetler içün Rusiyeni halqara uquq ceetinden mesüliyetke çeküv oğrunda küreşmege devam ete", — dep Tıhıy ayttı.
Telegram, WhatsApp ve Facebookta Suspilne Qırım haberlerine abune oluñız
