Birleşken Milletlerniñ işkence ve diger deşetli, insaniyetsiz ya da menlikni aşalağan areketler ya da cezalar boyunca mahsus maruzacısı Elis Cil Edvards Rusiye akimiyetini Rusiyede qanunsız tutulğan Qırımdan bir qaç ukrain siyasiy mabüsine acele ve tolu tibbiy yardım köstermege çağırdı. Olarnıñ arasında uquq qorçalayıcı Emir-Usein Kuku ve cemaat jurnalisti İrına Danılovıç bar.
Saban ayınıñ 10-nda Birleşken Milletlerniñ İnsan aqları Yuqarı komissarınıñ idaresi bu aqqında haber etti.
"Rusiyede tutulğan ukrainler ağır vaziyette bulunalar. Akimiyetke şunı hatırlatam ki, er bir mabüs er vaqıt insanlıq ve itibarnen yanaşılmalı, bu da kerekli tibbiy yardımnı kirsetmeli... Menim tetqiq etkenim sekiz adisede mabüslerniñ ciddiy hastalıqları bar edi, bazıları ayatlarına telükeli edi. Olarnıñ ayatını qorumaq içün acele areketler kerek", — dep mütehassıs bildirdi.
O qayd etti ki, tibbiy yardımnıñ red etilüvi işkence ya da başqa bir deşetli, insaniyetsiz ya da itibarını aşalağan davranış/ceza şekli olaraq tanıla bile.
"İşkence teşkil etilgen ve sistematik şekilde devam ete. Rusiye bu istismarlarnı başqa vaqıtqa qaldırmayıp toqtatmalı", — dep BMniñ mahsus maruzacısı qayd etti.
Edvardsnıñ aytqanına köre, eñ azından eki ukrain siyasiy mabüsi Rusiye müstemlekesiniñ hadimleri tarafından köteklengen soñ tibbiy yardımğa muhtac oldı. Biriniñ belkemigi qırıldı. Emir-Usein Kuku aqqında söz yürsetile. 2015 senesi FSB hadimleri tarafından köteklendi. O vaqıt onıñ yaraları tedaviylenmegen edi.
"Soñki beş yıl devamında Kuku bir sıra hastalıqlardan, şu cümleden, tedaviylenmegen ayaqlarında şişiklik ve böyreklerinde şiddetli ağrıdan, zarar körgen edi, onıñ içün acele ameliyat yapıldı, lâkin oña ameliyatnıñ çeşiti ya da neticeleri aqqında iç bir vaqıt haber etilmedi. O, Rusiye apishanesinde qala", — dep BMniñ İnsan aqları Yuqarı komissarınıñ idaresi bildirdi.
Aynı zamanda, mahsus maruzada qayd etilgenine köre, 3 saqatqa saqatlıqları içün kerekli tibbiy yardım kösterilmey.
Edvards, 2022 senesi çiçek ayında Qırımdaki avtobus toqtav yerinde hırsızlanğan ukrain uquq qorçalayıcısı, cemaat jurnalisti İrına Danılovıçnı de hatırladı.
"Onıñ qulaqlarında dayanılmaz ağrılar bar edi, amma tutulğan vaqıt oña kerekli tibbiy yardım kösterilmedi. Danılovıç sol qulağında eşitme qabiliyetini coydı, devamlı baş ağrısı, koordinatsiya bozuqlığı ve atta insult yaşadı. O, Rusiye apishanesinde qala", — dep aytıla haberde.
Telegram, WhatsApp ve Facebookta Suspilne Qırım haberlerine abune oluñız
