Qara qış ayınıñ 27-31 künleri Halqara deñiz teşkilâtı (IMO) Keriç boğazında "Volgoneft" tankerleriniñ qazası neticesinde mazut tökülmesiniñ ekologik aqibetlerini muzakere etti.
Ukraina etraftaki müit qoruvı ve tabiat resursları nazirligi bunı bildirdi.
Rusiye 700 deñiz quşınıñ ve 61 yunus balığınıñ ölüminiñ sebebi olğan ekologik felâket içün mesüliyetli, — dep IMO toplaşuvında Ukraina tarafınıñ maruzasında qayd etildi. Rusiye halqara uquqnıñ printsiplerini bozdı: deñiz ameliyatları içün kelişmegen gemilerniñ qullanılmaması boyunca mecburiyetlerini yerine ketirmegen, Ukraina tarafına adise aqqında haber etmege red etken.
"Ayrıca qayd etildi ki, aza devletler "talda flotu"na qarşı tedbirlerni quvetleştirmeli ve IMO A.1192(33) rezolütsiyasına riayet etüvini temin etmeli, bu da aza devletler ve bütün meraqlanğan taraflarnı "talda flotu"nıñ deñiz sektorında qanunsız areketlerniñ ögüni almaq içün nevbetteki sessiyada areketlerge yardım etmege çağıra", — dep Etraftaki müit nazirligi bildirdi.
Avstraliya, Kanada, Yaponiya, Norvegiya, AQŞ, Büyük Britaniya ve AB delegatsiyaları Rusiye Federatsiyasınıñ areketlerini ve ekologik standartlarğa riayet etmegenini takbih etip, Ukrainağa qol tuttılar.
Hatırlatamız ki, qara qış ayınıñ 31-nde Qara deñizni qorçalav eyyetiniñ 45-inci nevbetten tış toplaşuvında Romaniya, Bulğaristan, Türkiye, Gürcistan, Ukraina ve Rusiye vekilleri "Volgoneft" tankerleriniñ qazasınıñ aqibetlerini muzakere ettiler.
"Etraftaki müit saası halqara teşkilâtlarnı Rusiyeniñ areketlerini takbih etmege devam etecek, çünki o, büyük ekologik kirlenüv, felâketniñ ögüni aluv tedbirlerini almağanı ve halqara añlaşmalarnı bozğanı sebebinden qabaatlana", — dep müessise qayd etti.
Ukraina etraftaki müit qoruvı ve tabiat resursları naziriniñ birinci muavini Olena Kramarenko, Ukraina halqara makeme institutlarına, şu cümleden BMniñ Halqara makemesine, Rusiyege qarşı deñiz uquqı boyunca BM konventsiyasınıñ bozuluvı ve Keriç boğazında tankerlerniñ qazası sebebinden ekologik felâket sebebinden dava açmağa planlaştıra, dep bildirdi.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
Telegram, WhatsApp ve Facebookta Suspilne Qırım haberlerine abune oluñız
