Hersondaki makemesi, yerli iş adamını tecavuzcı devletine yardım etilmesi içün 11 yılğa azatlıqtan marum etken. Tayin etkenleri kibi, 2022 senesi onıñ iş hanesi, işğal akimiyetinen işdeşlikte bulunıp avtobus taşımalarnı teşkil etip Qırımğa balalarnıñ alıp çıqarılmasına imkân yaratqan edi.
Bunıñ aqqında Herson yerli makemesiniñ üküminde söz kete.
Makeme tayin etkeni kibi, iş adamı, naqliyatnıñ işğal departamentiniñ vekillerine añlaşmasını tizip Herson ve vilâyetiniñ başqa mesken yerleri ve işğal Qırımnıñ arasında yolları boyunca avtobus taşımalarnı azırlay edi. Bunıñ içün iş hane, közetme noqtalarnıñ keçmesi içün işğal akimiyetinden vaqtınca kirişliklerni alğan.
Uquq qoruyıcıları qayd etkenleri kibi, qabaatlanılğan, işğal memuriyetiniñ toplaşuvlarında iştirak etken edi. Bu toplaşuvlarnıñ vaqtında taşıyıcılarnı işini rusiye qanunlarına köre resmiyleştirmek, işğal bankında esaplarnı açmaq ve işğal akimiyetiniñ maliyeviy tarzda temin etilmesi içün bergini ödemege çağıra ediler.
Tintüvler vaqtında musadere etilgen deliller ve şaatlarnıñ şaatlıqları iş adamı, rusiye arbiylerniñ refaqatınen Hersondan Qırımğa balalarnıñ alıp çıqarılmasına imkân yaratqanını isbatladılar.
"O, reys yolı olmağan edi. Dispetçer, maña yol kâğıtnı berip Toqumacılıqlarnıñ medeniyet sarayına ketmege aytqan, anda rusiye arbiylerinen zırhlı maşnası turğan edi, dört "Tigr", işğal milisniñ eki maşnası ve dört "İksor" avtobusı. Balalar ana-babalarınen sağlıqlaşıp avtobusqa oturıp rusiye arbiyler ve "milisniñ" refaqatınen Qırımnen memuriy sıñırına alıp ketirilgen ediler", – makeme üküminde şaatnıñ sözleri.
Qabaatlanılğan öz qabaatını tanımayıp işğalcilerniñ basqısı astında arket etkenini bildirdi, amma bu iddialarnı makeme isbaatlanılmağan kibi tanığan.
Makemeniñ qararına köre, iş adamını malnıñ musadere etilmesinen 11 yılğa azatlıqtan marum etüvine makeme etiler. Daa 12 yıl içinde yolcu taşımalar saasında işhanecilik faaliyetinen oğraşmağa yasaq ettiler. Üküm, qanuniy quvetini daa almağan.
Telegram, WhatsApp ve Facebookta Suspilne Qırım haberlerine abune oluñız
