Kıyiv polisi stendap-komediyacı Anton Stenükniñ solo kontsertinde musulmanlar aqqında şaqa etken ve 2024 senesi berim ayında içtimaiy ağda bu şaqanen paylaştı. Uquq qorçalayıcılar bu qararnı cinayet terkibiniñ yoqluğınen añlattılar.
"İnterfaks-Ukraina" agentliginiñ sualine Kıyivdeki Ukraina Milliy polisiniñ Baş idaresiniñ taqiqat idaresiniñ cevabında bu aqqında aytıla.
Aktörge qarşı cinaiy dava açıldı, çünki Stenük vatandaşlarnıñ diniy işançlarına köre musaviylik aqqını bozdı (Ukraina CQniñ 161-nci maddesiniñ 1-inci qısmı).
Amma 2024 senesi ilk qış ayınıñ 6-nda makemeden evelki taqiqatnıñ neticelerine binaen cinaiy dava, cinaiy uquq bozuluvı esasında areket etmegeni içün qapatıldı (Ukraina Cinaiy qanunnamesiniñ 284-nci maddesiniñ 2-nci qısmı).
Stendap-komediyacı Anton Stenüknen bağlı qavğa aqqında ne bilemiz
2024 senesi berim ayınıñ 25-nde komediyacınıñ içtimaiy ağ saifesinde, musulmanlar aqqında şaqa etken kontsertinden bir parça sebebinden, bir qavğa çıqtı.
"Bu cenk — saçma bir şey. Dünyada musulmanlar çoq olğanda, nasıldır ortodokslar başqa ortodokslarnı öldüreler, bilmeyim. Men musulmanlarnı öldürmek kerek olğanını aytmayım, men kerekli adamım, şimdi bu vaqıt olmağanını añlayım. Amma daa çoq, bunı endi yeudiler yapalar", — Stenük öz çıqışında dedi.
Qırımtatar Milliy Meclisiniñ reisi Refat Çubarov, "Umma" Ukraina musulmanları diniy idaresiniñ müftisi Murat Süleymanov, em de "Umma" Ukraina musulmanları diniy idaresiniñ sabıq müftisi, Ukraina Silâlı quvetleriniñ arbiy hızmetçisi Sayid İsmagilov öz içtimaiy ağlarında komediyacınıñ şaqalarına qarşı çıqtılar.
Daa soñra artist video yayınladı, anda öz şaqaları tarafından raatsızlanğan er kesniñ ögünde afu soradı.
Yuqarı Şuranıñ insan aqları vekâletlisi Dmıtro Lubinets Milliy polisni Stenükniñ şaqalarını diniy duşmanlıqnı qozğatqanı ve müminlerniñ duyğularını yaralağanı içün teşkermege çağırdı.
Telegram, WhatsApp ve Facebookta Suspilne Qırım haberlerine abune oluñız
