Keriç boğazında ilk qış aynıñ 15 furtunağa oğrağan "Vologneft 212" ve "Vologneft 239" eki rusiye tankeriniñ qazası, deñizge mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Bunıñ aqqında Greenpeace Ukraine matbuat hızmeti bildire.
Teşkilâtnıñ malümatına köre, "eki rusiye tankı, rusiye flotı içün yaqar yükünen areket etken ediler, deñiz gemilerniñ yeriniñ tayin etüv sisteması ise – endi 12 kün sondürilgen edi (orta küz aynıñ 1-den nezaret etüv malümatları köstergenleri kibi, teslim etüv yolu, Volgograddan başlanıp Keriç boğazında bite)".
"Kirliklerni yalığa alıp çıqarsa, temizlemege qıyın olacaq yalı şeritiniñ bulaştıruvına alıp ketirecek. Etraftaki müitine tesir, tokülengen yermayınıñ soyına bağlı olacaq. Mazut kibi ağır qalımtı yermay mahsulatları, esasen, deñiz ayvanatlarına da tesir eteler. Gemiler batsa, yermay ve yermay maddelerniñ sürekli tokülüviniñ ihtimali bar", – haber etti doktor, Büyük Britaniyada Ekseter universitetiniñ bazasında Greenpeace sınav laboratoriyalarnıñ reberi Pol Conston.
Qayd etile ki, 2007 senesi Tuzla yarımadası yanında da deñizge mazutnıñ 1,2 tonnanıñ tokülüvi olğan. Vaqiadan zararı, qazadan bir yıl soñra bile duyula edi.
Telegram, WhatsApp ve Facebookta Suspilne Qırım haberlerine abune oluñız
