Qırımda yerli sakinlerni Ukrainağa qol tutqanları içün tutmağa devam eteler – atta gumanitar yardımğa donat yapqanı ya da Ukrainağa qol tutqan timsaller olğanı içün.
Soñki vaqıtları işğalci akimiyet qadınlarnıñ taqip etilmesine diqqat ayıra, siyasiy mabüsler arasında olarnıñ sayısı 2022 senesinden başlap pek arttı. Olarnı devlet hainligi ve "casuslıq"ta qabaatlaylar, sert izolâtsiyalarda tutalar ve ruhiy basqı yapalar.
Qırım uquq qorçalayıcı gruppasınıñ (QUQG) yolbaşçısı Olha Skrıpnık bunı bildirdi.
İşğalci tarafından tutulğan ve Aqmescitniñ 1. SİZOsında tutulğan uquqçı Lüdmıla Kolesnikovanen bağlı malümatnı izaatlap, o qayd etti kii, uquq qorçalayıcılar onıñ tutulğanı aqqında bileler, ve oña Rusiye Ceza qanunnamesiniñ 275 maddesine binaen oña qabaatlavlar berile bilecegine dair tahminleri bar. Bu madde boyunca qadın 12 seneden 20 senege qadar apis cezasını ala bile. Lâkin şimdilik resmiy tasdıq yoq.
"Kerçekten de, biz buña siyasiy manada yanaşamız. Böyle şeyler endi olğan edi. Olar yañı degil: insanlar, hususan, ukrain bankları vastasınen berilgen para içün tutuldı. Meselâ, Ukraina Silâlı quvetleri, dronlar ya da para toplağan başqa göñülli teşebbüsler, tek Ukraina silâlı quvetleri içün degil, aynı zamanda gumanitar ihtiyaclar içün de", — dep tarif etti Olha Skrıpnık.
O, Leniye Umerovanıñ davasını hatırladı, o da bank kartlarınıñ alınuvı ve olarnı cinaiy davağa delil olaraq kirsetmek ıntıluvlarınen beraber keldi. Skrıpnıknıñ aytqanına köre, bu, Rusiye er angi areketni, atta vatandaşlarğa qol tutmaq maqsadınen yapılğan areketlerni cinaiy sayğanını köstere. Olarnı casuslıq, devlet hainligi, Ukraina mahsus hızmetlerinen işbirligi kibi adlandıralar.
Uquq qoruyıcı, böyle davalar — Rusiye taqiqat izolâtorları (SİZO) içün adiy bir şey, dep qoştı. Böyle etip uquq qorçalayıcılar yerli ealige basqı yapmağa tırışalar.
"Federal havfsızlıq hızmetiniñ (FSB) emirinen SİZO memuriyeti, normal vatandaş ayatından tamamen ayırılğan izolâtor şaraitini qurmağa tırışa. Çoqusı allarda ilk basamaqlarda, ilk aylarda, insanlar öz tuvğanları ya da dostlarından haber alamaylar. Qorantalar yollama noqtasına kelgende, olarğa bu insan yoq, dep aytalar, kerçekte o anda tutulğan olsa da. Bizim tecribemizge köre bu, insannıñ taqiqatnen añlaşması, özüne qarşı uydurılğan bütün qabaatlarnı tanıması içün basqınıñ bir parçasıdır", — dep qayd etti Skrıpnık.
Olha Skrıpnıknıñ aytqanına köre, işğalciler, Lüdmıla Kolesnikovağa nisbeten, qanunsız ruhiy zorbalıq usullarını ya da basqınıñ başqa şekillerini, şu cümleden bedeniy basqı, qullana bileler. Em de uquq qorçalayıcılar adliyecilerniñ işine keder ete, davalarnı uydura bileler.
"Rusiye arbiy gemisi" NFT pulusı aqqında bugün belli olğan şeyler, siyasiy kontekstten belli. Yani o, siyasiy mabüstir. Ümüt etemiz ki, halqara diqqat onıñ azat etilmesine yardım eter", — dep qayd etti QUQGnıñ reisi.
Skrıpnık qayd etti ki, 2024 senesi "Qırımda uydurılğan davalar sebebinden tutulğan qadınlarnıñ sayısı pek arttı". Faqat yarımadada siyasiy mabüslerniñ tam sayısını aytmaq mümkün degil. Uquq qorçalayıcınıñ aytqanına köre, eñ azından yedi kişi aqqında belli.
"Bu raqam artmaqta. Qırımnen bağlı olğan tek qadınlar. Bundan da ğayrı, işğal etilgen Herson ve Zaporjjâ vilâyetlerinden qadın ve erkeklerni Qırımğa ketirmege devam eteler, anda olar sıq-sıq 2. SİZOda tutulalar, soñra ise Rusiye Federatsiyasına etap etileler. Onıñ içün qadınlarnıñ sayısı kerçekten de pek arttı, em qırımlı qadınlar, em de işğal etilgen topraqlarda hırsızlanğanlar arasında", — dep bildirdi uquq qorçalayıcı.
Hatırlatamız ki, Rusiye quvetçileri Qırımda advokat Lüdmıla Kolesnikovnı "Rusiye arbiy gemisi" aqqında NFT pullarını satın alğanı içün yaqaladılar.
Telegram, WhatsApp ve Facebookta Suspilne Qırım haberlerine abune oluñız
