"Tamır halqları aqqında" Ukraina Qanunına binaen, er tamır halqınıñ tamır halqları tarafından teşkil etilgen ve Ukraina Anayasası ve qanunlarına binaen tamır halqlarını temsil etmek ve olarnıñ adından qararlar qabul etmek aqqı berilgen temsil organına aqqı bar.
2023 senesi bozarğan aynıñ 5-nde Meclis qırımtatar halqınıñ temsiliy organı olaraq Meclisniñ uquqiy statusını belgilev aqqında vesiqalar paketini berdi. O yılnıñ orta küz ayından berli vesiqalar Nazirler Kabinetinde muzakere etile, amma iç bir deñişme olmadı.
Qırımtatar maaliy merkeziniñ idare yolbaşçısı, Qırımtatar Milliy Meclisiniñ azası Eskender Bariiev, "Tamır halqları aqqında" qanunınıñ ve temsil organınıñ uquqiy statusını belgilev ve lâğu etüv nizamnamesiniñ yerine ketirilmemesi aqqında muracaatnen Ukraina Nazirler Kabinetine mektüpler yollanılğanını Suspilne Qırımğa bildirdi.
Faqat Nazirler Kabineti Ukraina devlet qavmiy-siyasiy ve vicdan serbestligi hızmetine muracaat etti, Bariievniñ aytqanına köre, DQVSH öz vekâletlerine ait bütün protseduralarnı becerdi.
"Bu qararnı tek Ukraina baş naziri imzalay bile. Bunıñ sebebini añlamayım. Çünki imij ceetinden bu Ukraina içün halqara seviyede pek müim. Ve Nazirler Kabinetiniñ bunı ne içün yapqanını pek añlaşılmay. Çünki bu, "Ukrainanıñ tamır halqları aqqında" Ukraina qanunınıñ qabul etilmesiniñ teşebbüsçisi olğan Ukraina prezidenti Volodımır Zelenskıynıñ itibarını tüşüre", — dep Bariiev qayd etti.
Şimdi Bariiev, Meclisniñ azası ve qayd etüv protsedurasınen oğraşmağa vekâletli olaraq, Kıyiv bölgesiniñ memuriy makemesinde dava açtı. O şunı da qayd etti ki, eger Nazirler Kabineti emirni imzalap, qanun talaplarını yerine ketirse, dava lâğu etilir.
"Eger Nazirler Kabineti bu meseleni imzalamasa, Ukraina Nazirler Kabineti tarafından Ukraina qanunlarınıñ yerine ketirilmesi içün uquqiy yolnen küreşmege devam eterim. Makeme davası tek berim ayında açıldı. Mektüpler bar edi, muracaatlar bar edi, yazıq ki, neticelerni körmeymiz", — dep Bariiev qayd etti.
Suspilne Qırım Ukraina Nazirler Kabinetine muracaat etip, vaziyetni añlatmağa rica etti. Bu malümat derc etilgende cevap berilmedi.
Qırımtatar Milliy Meclisi — qırımtatarlarnıñ saylağan temsil organıdır. Amma şimdilik Meclis Ukraina uquqiy boşluğında subyekt olaraq yoq, yani uquqiy şahıs olmay.
Telegram, WhatsApp ve Facebookta Suspilne Qırım haberlerine abune oluñız
