14 yıllıq apis cezasına maküm etilgen qırım siyasiy mabüsi Akim Bekirovnı Saratov vilâyetiniñ Balaşov apishanesinden Çuvaşiya Cumhuriyetiniñ VK-9 şeerine etap ettiler.
Onıñ apayı Sabriye bu aqqında haber etti, dep yazdı "Qırım birdemligi".
Siyasiy mabüsni Balaşovdan 2024 senesi berim ayınıñ 12-nde çıqarıldı. Soñra onı etapnen Saratov SİZOsına, Kazanğa ve Tsivilsk SİZOsına etap ettiler. Orta küz ayınıñ 1-nde o, qorantalarına onı müstelekege avuştıracaqlarını bildirdi. O, VK-9-ğa kelgen soñ, karantinde bulunğan başqa qırım siyasiy mabüsi vastasınen haber ete bildi.
Akim Bekirov aqqında ne bilemiz
Akim Bekirov - qırımtatar faalcisi. Apiske alınğanına qadar IT-telükesizlik meselelerinen oğraşa edi, SİZOğa posılkalarnı yollamağa yardım ete edi, makeme esnaslarına bara edi.
2019 senesi saban ayınıñ 27-nde işğal etilgen Qırımda Aqmescit rayonınıñ Canköy, Stroğanivka ve Yañı Abdal köylerinde kütleviy tintüvler keçirildi. Yaqalanğan eki qırımtatar arasında Akim Bekirov da bar edi.
2022 senesi martnıñ 18-nde Cenübiy bölge arbiy makemesi Akim Bekirovnı 14 yıl sert rejimli müstemlekede qalmasına üküm etti. O, Rusiyede terrorcı sayılğan, amma dünyanıñ bir sıra başqa memleketinde izin berilgen "Hizb ut-Tahrir" islâm firqasınıñ faaliyetini teşkil etkeninde qabaatlandı.
2023 senesi bozarğan aynıñ 7-nde Moskvadaki Apellâtsiya arbiy makemesi qararnı amelde qaldırdı.
Akim Bekirov Qırım ve Rostov vilâyetiniñ tahqiqat izolâtorlarında dört yıldan çoq tutuldı. Onıñ apiste olğan qadını ve eki çağına yetmegen balası bar.
Telegram, WhatsApp ve Facebookta Suspilne Qırım haberlerine abune oluñız
