2024 senesi berim ayınıñ 4-nde qırım siyasiy mabüsi Aziz Ahtemovnı Rusiye Federatsiyasınıñ Krasnoyarsk vilâyetindeki Yeniseysk şeerinde apishaneden etap ettiler. Qırımtatarnı belli olmağan yerge alıp kettiler.
Siyasiy mabüsniñ apayı Adile Ahtemova bu aqqında haber etti.
Qadın, malümatnı tasdıqlamaq içün apishanege telefon etmege tırışqanını qayd etti, amma Krasnoyarsk vilâyetiniñ Yeniseysk şeerindeki T-2 FKUFederal ceza müessisesida oña cevap bermeyler.
"Azizni ne yerge etap etkenlerini bildirmeleri içün apishanege elektron mektübimni yollağanda, bu malümatnı bermege red ettielr, çünki üçünci şahıslarğa bu malümatnı bermemege aqqı bar edi. Şimdiki vaqıtta aqayımnıñ bulunğan yeri ve alıp ketilgen yeri aqqında malümat yoq", — dep Ahtemovanıñ beyanatında bildirildi.
Aynı zamanda Qırımtatar Milliy Meclisiniñ reisiniñ birinci muavini Nariman Celâl qayd etti ki, Azizniñ apis müddeti bitecek edi ve o sert rejimli müstemlekege yollanılacaq edi.
"Amma tuvğanlarına etap aqqında haber bermediler. Onıñ soñ noqtasını da aytmaylar", — dep qayd etti Celâl.
Nariman Celâl ve Ahtemov qardaşları aqqında ne bilemiz
Nariman Celâlov — 2016 senesi Rusiye tarafından "ekstremist teşkilât" olaraq tanılğan Qırımtatar Milliy Meclisiniñ başınıñ muavinidir. Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Celâlov 17 senege üküm etildi, 700 biñ ruble para cezasını aldı ve 1,6 sene devamında areket serbestligi sıñırlandı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
2024 senesi bozarğan aynıñ 28. künü esir etilgenlerniñ deñişmesi çerçivesinde Ukraina, Nariman Celâlnı evge qaytardı.
Telegram ve Facebookta Suspilne Qırım haberlerine abune oluñız
