Qırımdaki soñki ukrain kilsesiniñ - Ukraina Ortodoks kilsesiniñ (UOK) Hrestovozdvıjenskıy kilsesiniñ işğalciler tarafından yıqıluvınıñ fotoresimleri peyda oldı. İşğalciler Kezlevde oraq ayınıñ 21-nde yoq etmge başladılar.
Bu fotoresimlernen Suspilne Qırım paylaşa.
"Bu kilse Kezlevniñ yataq rayonında, pedagoglar ve terbiyeciler yaşağan eki yataqhaneniñ arasında qurulğan. Onı bu sene oraq ayında çıqarmağa başladılar. Şimdi qulle, bezeklerni alıp taşladılar, ve kün-künden temeli, yani kilseniñ divarları olğan tahtalarnı alıp taşlaylar", — dep yerli sakin añlattı.
Hatırlatamız ki, işğalciler tarafından Qırımdaki soñki ukrain kilsesiniñ — Kezlevdeki Ukraina Ortodoks Kilsesiniñ Hrestovozdvıjenskıy kilsesiniñ yıqıluvı sebebinden Ukraina Medeniyet ve malümat siyaseti nazirligi UNESCOğa muracaat etti. Teşkilât bu areketni genotsid olaraq qayd etti. İşğalcilerniñ böyle areketleri, Rusiye Federatsiyasına vaqtınca işğal etilgen topraqlarda zarar körgenleri içün tazminat talap etüv içün daa bir delil olaraq qayd etildi.
Suspilne Qırımğa Ukraina Medeniyet ve malümat siyaseti nazirliginiñ yolbaşçısınıñ vazifelerini vaqtınca eda etken Rostıslav Karandeyev bunı bildirdi.
O, ibadethaneniñ yoq etilüvini "insanlıqqa qarşı areket" ve "Ukraina inancını, ukrain ğayesini Qırımdan sıqıştırmaq maqsadınen yapılğan areket" dep adlandırdı. Onıñ sözlerine köre, işğalciler öz maqsadını yerine ketirmege tırışalar — Şura Birligi yapqanı kibi, er şeyni yoq etmek.
Kezlevdeki UOKniñ Hrestovozdvıjensk kilsesi aqqında ne bilemiz
İşğal etilgen Qırımnıñ Kezlev şeerinde oraq ayınıñ 21-nde ruslar yarımadada soñki ukrain kilsesini — Ukraina Ortodoks Kilsesiniñ Hrestovozdvıjensk kilsesini yoq etmege başladılar. Ukraina Ortodoks Kilisesinde bildirdiler ki, Rusiye Qırımda ukrainlerniñ genotsidini devam ete, er şeyni yasaq ete ve yoq ete, şu cümleden bu kilseni de.
Ukraina Ortodoks Kilisesiniñ Qırım yeparhiyasınıñ vekâletli temsilcisi Andriy Şçekun qayd etkenine köre, ukrainler susıp qalmamalılar, milliy ve halqara meydanlarda Rusiye cinayetleri aqqında aytmalılar, Rusiye tarafından başlatılğan genotsid cenkine cevap bermeliler.
Aynı zamanda Ukraina Baş prokurorınıñ sabıq muavini Gündüz Mamedov, IV. Jenevre şartnamesine binaen, işğal etilgen topraqlarnıñ vatandaşları öz diniy işançlarına ürmet köstermek aqqına malik, işğalci bir devlet ise diniy hızmetçilerge dindaşlarına maneviy destek köstermege izin bermeli, dep qayd etti.
Ukraina prezidentiniñ Qırım Muhtar Cumhuriyetindeki temsilciligi, dünyanı yarımadada işğalcilerniñ Ukraina Ortodoks Cemiyetini taqip etüvini ve ibadethanelerni yoq etüvini takbih etmege ve aynı uquqlarnıñ daa bir bozuluvına cevap bermege çağırdı.
Oraq ayınıñ 22-nde Qırım Muhtar Cumhuriyeti ve Aqyar şeeriniñ prokurorlığı cenk qanunları ve adetlerini bozğanı içün Kezlevdeki Hrestovozdvıjensk Kilsesiniñ yoq etilüvi sebebinden cinaiy dava açtı.
Kezlevdeki UOKniñ Hrestovozdvıjensk kilsesi aqqında ne bilemiz
Kezlevdeki Hrestovozdvıjensk kilsesi Qırım işğal etilmeden evel 2014 senesi qadimiy ğarbiy ukrain kilsesiniñ tipik leyhası boyunca qurulmağa başladı — bütün elementler elnen yapıldı, onı mıhlar, skobalar ve zemaneviy şaraitte qullanılğan başqa elementler qullanmadan qurdılar, dep Ukraina pravoslav kilisesiniñ matbuat hızmeti bildirdi.
UOKde buña uyğun vesiqalar bar. Bu kiçik ağaç ibadethane ya da, cemaatnıñ adlandırğanları kibi, kilse-çasovnânı cemaat özü qurğan.
İşğalden soñ ruslar onı yıqmaq içün çoq areket ettiler. Bundan da ğayrı, 2014 senesi kilseniñ qubbesi yaqıldı, soñra onı yañıdan qurdılar.
Yepiskop Klıment ukrain kütleviy haber vastalarına haber etti ki, kilseniñ yıqılmasınıñ teşebbüsçisi işğalli qırım halqınıñ «Qırımçaqlar» Qırım cumhuriyetiniñ medeniy-maarif cemiyetiniñ «reberiniñ muavini» Purım M.İ. oldı.
2019 senesi boş ayda işğalli Kezlev şeer makemesi Ukraina pravoslav kilisesiniñ bu ağaç kilsesini yıqmağa emir etti, bu ise «Kezlev idaresiniñ» «belediye topraqnı boşatuv ve qurulğan qurulışnı yıquv işlerini yapmaq» talabını bildirdi.
2020 senesi oraq ayınıñ 23-de Aqmescit ve Qırım UOKniñ arhiyepiskopı Klıment Qırımnıñ «makeme taqiqatçısı hızmetiniñ» emrini aldı. Kezlevdeki UOKniñ kilsesi beş kün içinde yıqmağa qarar alındı. İşğal memuriyetiniñ boşatmağa talap etkeni yerniñ meydanlığı 30 kvadrat metr edi.
2024 senesi oraq ayında Kezlev şeeriniñ işğal memuriyeti ukrain kilsesini yıqmaq maqsadınen ruhset almaq içün Qırım Cumhuriyetiniñ Kezlev şeer makemesine muracaat etti.
2022 senesine qadar Qırım Yeparhiyası Ukraina mitropoliyasına boysundı, amma işğalciler onı qanunsız olaraq Rusiye pravoslav kilisesine qoştılar. Bir seneden çoq o, Moskva patriarhatınıñ doğrudan-doğru idaresi altında zornen buluna.
Telegram ve Facebookta Suspilne Qırım haberlerine abune oluñız
