Çelâbinsk makemesi, ağır hasta olğan qırım siyasiy mabüsi Tofik Abdülgaziyevniñ azat etilmesi aqqında advokatlarnıñ muracaatlarını red etti. Yuqarı Şuranıñ insan aqları vekâletlisi Dmıtro Lubinets Rusiye insan aqları vekâletlisine muracaat etip, ağır hasta qırımtatar Tofik Abdulgaziyevni acele azat etmege talap etti.
Lubinets öz Telegram kanalında bunı bildirdi.
"Rusiye insan aqları vekâletlisine muracaat etip, ağır hasta qırımtatar Tofik Abdulgaziyevni acele azat etmege talap ettim. Türkiye, Qatar, BAE, Saudiy Arabistan halqara zenaatdaşlarına muracaat etip, sağlıqqa uyğun olmağan tedaviylenemez hastalıqlar sebebinden qanunsız apiske alınğan kişiniñ azat etilmesine yardım etmege rica ettim", — dep Lubinets qayd etti.
Ombudsmannıñ qayd etkenine köre, apishanelerde yaramay tutuv ve tibbiy yardımnıñ vaqtında berilmemesi, adamnıñ 40 kg azlaşmasına sebep oldı. Bundan da ğayrı, Abdulgaziyevniñ apiske alınmazdan evel olmağan sağlıq meseleleri peyda oldı.
Lubinec, 2024 senesi saban ayında, vaziyetiniñ fenalaşqanı içün Tofik Abdulgaziyev hastahanege alındı, dep qoştı. O vaqıt oña aqciger ve başqa ağır hastalıqlar diagnozı qoyulğan.
Yuqarı Şuranıñ insan aqları vekâletlisi qayd etti ki, mabüslerge kerekli tibbiy yardım kösterilmegeni İnsan aqları ve esas serbestliklerini qoruv şartnamesiniñ 3. maddesini boza, çünki o, işkencege oğratılmasını yasaq ete.
O hatırlattı ki, keçken sene Rusiyeniñ apishanelerinde eki qırım siyasiy mabüsi — Cemil Ğafarov ve Kostântın Şırinğ vefat etti, olar ciddiy sağlıq meselelerine baqmadan, kerekli tibbiy yardımnı almadılar.
"Bir daa dünya cemaatını Rusiyege qarşı basqını quvetleştirmege çağıram, şu cümleden, qanunsız tutulğan Ukraina vatandaşlarınıñ azat etilmesi içün sanktsiyalar kirsetmege çağıram", — dep Lubinets hulâsa çıqardı.
Tofik Abdulgaziyev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziyev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugaziyevğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziyev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziyev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Telegram ve Facebookta Suspilne Qırım haberlerine abune oluñız
