İşğalciler tarafından 18 senege maküm etilgen 62 yaşındaki qırım siyasiy mabüsi Enver Ömerovnı Vladimir şeeriniñ 2. apishanesinden etap ettiler.
Onıñ qızı Fatma İsmailova bunı bildirdi, dep "Qırım birdemligi" yazdı.
Qayd etilgenine köre, siyasiy mabüs "ZonaTelekom" bağı vastasınen qorantasına telefon etip, al-azırda tranzitte olğanını bildirdi. Arman ayınıñ 3-nde onı Rusiyeniñ Mariy El şeerindeki sert rejimli müstemlekesine etapnen yollamağa planlaştıralar.
"Anamnen beraber bugün babamnen çoq vaqıttan berli ilk sefer laf ettim. O, eki buçuq ay tutılğan Vladimir şeeriniñ apishanesinden çıqarıldı. O, apis etilgen oğlu Riza içün qasevetlene edi", — dep İsmailova añlattı.
"Hizb ut-Tahrir davası"nıñ Qarasuvbazar gruppası aqqında ne bilemiz
2019 senesi bozarğan aynıñ 10. künü Ayder Capar, Enver Ömerov ve onıñ oğlu Riza tutuldı. 2021 senesi qara qış ayında Rostov-na-Donudaki Cenübiy bmlgeniñ arbiy makemesi Enver Ömerovnı Hizb ut-Tahrir terror teşkilâtınıñ teşkil etilmesinde, Riza ve Ayderni iştirak etmesinde qabaatladı. Enver Ömerov 18 senege ve Riza Ömerov 13 senege üküm etildi. Ekisi de cezasınıñ birinci üç senesini apishanede keçirecek ediler.
2022 senesi saban ayınıñ 10-nda Vlasis şeerindeki apellâtsiya arbiy makemesi, birinci makemeniñ ükümini deñiştirmemege qarar aldı. 2023 senesi boş ayda kassatsiya makemesi, Hizb ut-Tahrirniñ Qarasuvbazar gruppasınıñ mabüslerine çıqarılğan ükümni de deñiştirmedi.
Advokatlarnıñ qayd etkenlerine köre, birinci seviyeli makeme ve istinaf makemesinde bu cinaiy davanıñ şaatları "cinayet qanunını bozıp" sorğuğa çekildi — şahsiyetleri sebepsiz şekilde gizli tutuldı, taqiqat ve qabaatlayıcı tarafı ise bir kere bile bunıñ ne içün kerek olğanını isbatlamadı. Davanıñ iştirakçileri öz taqiplerini "Qırımtatarlarnı milliy ve diniy sebeplerden taqip etüvniñ büyük zıncırında bir zıncır" dep adlandırdılar.
2019 senesi oraq ayınıñ 18-nde Avropa parlamenti Rusiyeni bütün ukrain siyasiy mabüslerini, şu cümleden Qarasuvbazar gruppasınıñ mabüslerini azat etmege çağıruv rezolütsiyasını qabul etti. Ukraina ve Rusiyedeki uquq qorçalayıcılar olarnı siyasiy mabüsler olaraq tanıdı ve olarnıñ alecen azat etilmesini talap etti.
Telegram ve Facebookta Suspilne Qırım haberlerine abune oluñız
