Qırımdaki FSB hadimleri Simeiz köyüniñ sakinini, "terror teşkilâtı"nıñ terkibinde cenk areketlerinde iştirak etmek içün Rusiyeden Ukrainağa çıqmağa tırışqanı içün tuttılar.
RİA "Novosti Krım" Rusiye FSBsiniñ Qırım ve Aqyardaki matbuat hızmetine atfı etip, bunu bildire.
"Belli oldı ki, Simeiz köyüniñ 1987 senesi doğğan sakini, Rusiyeden Ukrainağa çıqıp, terror birleşmesiniñ terkibinde cenk areketlerinde iştirak etmek qararını aldı", – dep bildirildi.
İşğalcilerniñ qayd etkenlerine köre, bu adam ukrain tarafınen bağlanıp, Rusiye ordusına qarşı cenk areketlerinde iştirak etmege istegenini bildirdi ve ukrain askerlerinden talimat aldı. Cinayet yapacaq adamnıñ yaşağan yerinden kompyuter, bağ vastaları ve başqa delillerni tutıp aldılar, olarnı idarecisinen bağlanmaq içün qullanalğan edi. Şimdi "terror teşkilâtınıñ faaliyetinde iştirak etmege azırlamalar" maddesine binaen cinaiy dava açıldı. İşğalli makemeniñ qararına köre adam apiske alındı.
Şu anda Ukraina tarafı bu vaqianı resmen tefsir etmedi.
Telegram ve Facebookta Suspilne Qırım haberlerine abune oluñız
