İşğalciler "qaçmağa ve aşırıcılıqqa avesligi" sebebinden jurnalist Ruslan Süleymanovnı qorçalayıcı sicilge kirsettiler

İşğalciler "qaçmağa ve aşırıcılıqqa avesligi" sebebinden jurnalist Ruslan Süleymanovnı qorçalayıcı sicilge kirsettiler

Ruslan Süleymanov
Ruslan Süleymanov. Фото: Кримська солідарність

2022 senesi işğalciler tarafından 14 senege maküm etilgen içtimaiy jurnalist Ruslan Süleymanovnıñ "qaçmağa ve ücüm etmege, aşırıcılıq faaliyetine avesligi" sebebinden onı apishanedeki qorçalayıcı sicilge kirsettiler.

Onıñ apayı Elzara Süleymanova "Qırım birdemligi"ne bu aqqında haber berdi.

Şu anda Ruslan Süleymanov, RFnıñ Çelâbinsk vilâyetiniñ Verhnöuralsk apishanesinde buluna. Novoçerkassktaki SİZOdan etap etilgen soñ onı şu apishanege alıp ketirdiler.

Elzara Süleymanovanıñ sözlerine köre, aqayını etap etken soñ onı qorçalayıcı sicilge kirsettiler. O haber berdi ki, yataqta oturğanı sebebinden aqayı eki kere ceza aldı.

"Hizb ut-Tahrir davası"nıñ ekinci Aqmescit gruppası aqqında ne bilemiz

2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.

Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.

Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.

2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.

Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.

2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.

Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.

Telegram ve Facebookta Suspilne Qırım haberlerine abune oluñız

На початок