Ekinci Canköy gruppasınıñ iştirakçileriniñ advokatları, makeme oturışlarıda protokol bozulğanı aqqında haber berdiler

Ekinci Canköy gruppasınıñ iştirakçileriniñ advokatları, makeme oturışlarıda protokol bozulğanı aqqında haber berdiler

ekinci Canköy gruppası
"Hizb ut-Tahrir" davasınıñ ekinci Canköy gruppasınıñ iştirakçileri. Кримська солідарність

"Hizb ut-Tahrir" davasınıñ ekinci Canköy gruppasınıñ iştirakçileriniñ advokatları, mayıs ayınıñ 28. künü rus makemesiniñ oturışında araştırılğan şahsiyetniñ umumiyleştirici protokolnıñ bozulğanını bildirdiler.

Uquq qorçalayıcı Lilâ Gemeci "Qırım bilrdemligi"ne bu aqqında haber berdi.

O qayd etti ki, qorçalayıcı taraf rus makemecileriniñ diqqatını şuna celp etti: bu protokollar, operativ-qıdıruv faaliyetibiñ vesiqalarına aittir. Lilâ gemeci añlattı ki, tamam bunıñ içün rus prokurorı, davanıñ iştirakçileriniñ qabaatınıñ delilleri olaraq qullanamaz edi, çünki taqiqatçı olarnı ceryan devrinde qayd etmedi, şu protokollar ise mündericesindeki bozmalar sebebinden qullanılamaz delillerdir.

Uquq qorçalayıcı añlattı ki, Mustafaev tahallüsinen gizlengen şaatlardan biri bildirdi ki, qara saqalı ve qara saçlarına köre Ekrem Kroşnı tanıdı. O, bu protokollarnen davağa ait olğan bütün foto resimlerde saqallı bir insan olmağanına diqqat celp etti.

"Şaat kimni tanığanı belli olmay", — qayd etti o.

Lilâ Gemeci qoştı ki, makeme oturışında diñlev devrinde çıqarılğan sesleriniñ stenogrammasını diñlediler. O añlattı ki, qorçalayıcı taraf ve rus makemesi bile, prokurornıñ insanlarnıñ "qabaatını tasdıqlaya" bilgen qısımlarını saylağanına israr ettiler.

"Çünki kerçekten de bu audiolar, farqlı mezvularnı, şu cümleden islâm, namaz qıluvı, oraza tutuv kibi mevzularnı, muzakere etken şahsiy adamlarnıñ subetidir. Qorçalayıcı taraf, qabaatsızlığına israr etmege devam ete", — añlattı o.

"Hizb ut-Tahir" davasınıñ ekinci Canköy gruppası aqqında ne bilemiz

Qara qış ayınıñ 24-ünde Canköy rayonınıñ köylerinde insanlarnıñ evleri tintilgen soñ altı qırımtatar adamı tutuldı ve Aqmescitke ketirildi. Anda ertesi künü olar tevqif etildi ve 1. SİZOda qapatıldı.

Arman ayında olarnıñ cinaiy davasınıñ bilgileri Rostov-na-Donudaki Cenübiy bölge arbiy makeemsine yollandı. Olar, Rusiyede yasaqlanğan ve dünyanıñ ülkeleriniñ çoqusında serbest şekilde faal etken "Hizb ut-Tahrir" islâm fırqasında iştirak etmege qabaatlanalar.

Berim ayınıñ 13-ünde belli oldı ki, "dava"nıñ iştirakçileri Aqmescitteki taqiqat izolâtorından Rostov-na-Donudaki 1. SİZOğa etap etildi.

Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.

Telegram ve Facebookta Suspilne Qırım haberlerine abune oluñız

На початок