İşğal etilgen Qırımnıñ Arbiy komissarlıqnıñ arbiy-ekim ekspertizası merkeziniñ "başı" Kırılo Dovğulevıç bildirdi ki, er sene Qırımnıñ sakinleriniñ rus ordusında hızmetke uyğınlığı artıp tura. Bundan ğayrı, er bir belediye teşkilâtında "baar mobilizatsiyası" çerçivesinde tibbiy eyyetler teşkil etildi.
"Moskva komsomolcısı" rus teşviqat basımına bu aqqında haber berdi.
"Keçkende o, (RF ordusında hızmetke uyğınlıq — muar.) tahminen 75% edi, şimdi ise artıp tura. Sağlam insanlarnıñ sayısı artıp tura", — dep Dovğulevıç ayttı.
Onıñ sözlerine köre, yarımadanıñ er bir belediye teşkilâtında mütehassıs-ekimlernen (şu cümleden, cerrahlar, terapevt, köz ekimi, boğaz ve qulaq ekimi, teri ekimi, ruhiyatçı ve il.) tibbiy eyyetler teşkil etildi.
İşğal etilgen Qırımnıñ Arbiy komissarlıqnıñ arbiy-ekim ekspertizası merkeziniñ "başı" qoştı ki, "mobilizatsiya eyyeti"ne kerekli olsa, sağlıq sistemasında mobilizatsiya oluncılarnı teşkermek mümkün.
"Biz, sağlıq alına uyğun ya da teşkerüvge köre sıñırlanıp uyğun vatandaşlarnı yollaymoz. Tibbiy eyyetniñ neticelerine köre, vatandaşnıñ hızmetke uyğun, sıñırlarnen uyğun ve sıñırlanıp uyğun olğanı qarar alına. Bundan ğayrı, mobilizatsiya yaşındaki vatandaşlar vaqtınca uyğun olmağan ya da tamamınen uyğun olmağan ola bilir", — dep qayd etti.
Qırımda baar "mobilizatsiyası" aqqında ne bilemiz
Kremlniñ başı Vladimir Putinniñ emrine köre, "baar mobilizatsiyası" çerçivesinde 2,5 biñ insannı mobilizatsiya etmege planlaştıralar.
2015 senesinden berli Qırımda 18 qanunsız mobilizatsiya kampaniyası oldı. Olar çerçivesinde RF SQe tahminen 44,5 biñ insan mobilizatsiya etildi.
Aynı zamanda 2024 senesiniñ brinci üç ayı devrinde işğal etilgen Qırımda insan aqlarınıñ bozulmasınıñ talilini taqdim etkende Qırımtatar Maaliy Merkeziniñ başı Eskender Bariiev bildirdi ki, çiçek aynıñ 1. künü başlağan yarımadada 19. qanunsız mobilizatsiya kampaniyası çerçivesinde 15 biñ Qırımnıñ sakinini mobilizatsiya etmege planlaştıralar.
Qırımda 25 "mobilizatsiya eyyeti" belediye teşkilâtı ve yarımadanıñ "mobilizatsiya eyyeti"ni teşkil ettiler. Bundan ğayrı, "baar mobilizatsiyası" devrinde mobilizatsiya yaşını arttırdılar.
V. Jenevre şartnamesiniñ 51. maddesine köre işğal etlgen topraqlar ve ayrıca Qırımnıñ sakinlerini rus ordusına mobilizatsiya etmek yasaq ve Halqara cinaiy makemeniñ Roma beyannamesiniñ (2)(a)(v) maddesine köre cenk cinayetidir. Halqara cinaiy makemeniñ Roma beyannamesiniñ (2)(b)(xv) maddesine köre Ukraina vatandaşlarını öz devletine qarşı arbit areketlerde iştirak etmege mecbur etmek te ayrı cenk cinayetidir.
