İşğal etilgen Qırımda yarımada sakinlerine qarşı basqılar dalğası devam etmekte. Rusiye havfsızlıq küçleri, içtimaiy ağlarda ukrain tarafdarı fikirleri içün adamlarnı tutalar, olarnı "satqınlıq", "ekstremizm" ve "terrorizmni aqlav"-da qabaatlaylar.
Suspilne Qırım, keçken afta içinde yarımada sakinlerine qanunsız tutuvlar ve çıqarılğan cezalar aqqında umumiy malümat azırladı.
"Devlet hainligi"nde şübhelengen eki yerli sakin tutulıp tevqif etildi
"Tahqiqat"nıñ malümatına köre, 1977 ve 1993 senesi doğğan şübheliler, "olarnıñ yerleşüv koordinatları ve obyektlerde bulunğan işçilerniñ kategoriyalarını qayd etip" Qırımdaki kritik astyapı ve arbiy tehnika obyektleriniñ fotoresimleri ve videolarını Ukrayina havfsızlıq hızmetine berdiler.
"Tutulğanlardan itirafname alındı. Tevqif etüv kibi qorçalayıcı tedbir alındı", — dep işğalli müessise qayd etti.
FSB, adamlarnı Telegram vastasınen "çıqarğanları"nı da ilâve etti.
Telegramda "terrorizmni aqlağan" bir tefsir içün Keriç sakinine qarşı cinaiy davası açılğan
İşğal etilgen Qırımda Rusiye FSBsi, tahqiqatnıñ fikirince, Telegramda "terrorizmni aqlağan" bir tefsir içün Keriç sakinine qarşı cinaiy dava açtı. O, 7 yılğa qadar apis cezası üküm etile bilir.
"Lingvistik ekspertiza tefsirde terrorizmni aqlağan alâmetler olğanını tasdıqladı", — dep Rusiye FSBsiniñ Qırım ve Sevastopol (Aqyar) şeerindeki idaresiniñ beyanatında qayd etildi.
Onı qabaatlağan madde 7 yılğa qadar apis cezasını belgiley.
Eki Keriç sakini, "işğal etilgen Qırımda patlavlarnı azırlağanı, devlet hainligi ve terroristik faaliyeti"nde qabaatlanıla
Keriçniñ eki sakini "Ukrayina istihbaratınen işbirlik yapqanı, işğal etilgen Qırımda patlavlarnı azırlağanı, devlet hainligi ve terroristik faaliyeti"nde qabaatlana. Sevastopol (Aqyar) şeeriniñ işğalli prokurorlığı bunı bildirdi.
Rusiye quvetçileri bildirdiler ki, olarnı 2024 senesi çiçek ayında Sevastopolda (Aqyarda), gizli yerden patlayıcı cihazlarınıñ parçalarını almağa tırışqanda yaqaladılar.
Qabaatlav terroristik faaliyetke azırlanuv, devlet hainligi, patlayıcı aletlerni azırlav ve saqlav ve terroristik areketke azırlav maddelerine istinaden yapıldı.
45 yaşındaki Yalta sakini içtimaiy ağlardaki yazıları sebebinden qabaatlana
İşğal etilgen Qırımda 45 yaşındaki Yalta sakini içtimaiy ağlardaki yazıları sebebinden "aşırıcılıq faaliyetine açıq çağıruvlar"nen qabaatlana. O, 5 yılğa qadar apis cezasına mahküm etile bilir.
Onıñ adı aydınlatılmay, yazılarnı derc etken platformalar da aydınlatılmay. Şimdiki vaqıtta qabaatlanğan şahıs ya da onıñ imayecisi tarafından iç bir türlü açıq izaat berilmedi.
Qırımtatar resurs merkeziniñ malümatına köre, 2025 seneniñ oraq ayında: Rusiye apishanelerinde 260 siyasiy mabus tutulmaqta, olardan 153 – qırımtatarlar. Umumen, işğal devirinde QRM, siyasiy sebeplernen bağlı 413 cinaiy işini qayd etti, olardan 245 qırımtatarlarğa qarşı edi.
Ayrıca, QRM Noman Çelebicihan adına batalyonda iştirak etmek içün 57 taqip adisesi qayd etti, olardan 38-i işğal etilgen Herson vilâyetindedir.
Telegram, WhatsApp, Facebook ve YouTube-ta Suspilne Qırım haberlerine abune oluñız
