Cenübiy bölgeniñ arbiy mahkemesi "Hizb ut-Tahrir davası"nıñ altıncı Bağçasaray gruppasınıñ mabülerine tevqif tedbirini devam ettirdi. Qırımtatar faalcileri Memet Lümanov, Mustafa Abduramanov ve vatandaş jurnalistleri Rustem Osmanov ve Aziz Azizov eñ azından 2025 senesi orta küz ayınıñ 7-ne qadar apiste qalacaqlar.
İlk yaz ayınıñ 23-nde advokat Emil Kurbedinov "Qırım birdemligi"ne bunı bildirdi.
İmayeciniñ aytqanına köre, devlet qabaatlayıcısı sıñırlav tedbirini devam ettirmek içün adiy deliller berdi: qabaatlanğanlar gizlene, şaatlarğa tesir ete ya da qanunsız areketlerni devam ettire bileler.
İmayeci taraf, mabüsler tarafından böyle areketler yapılğanına dair iç bir delil olmağanını qayd etip, red etti.
"Qabaatlayıcı taraf, mabüsler ne içün ev apsinde tutulamağanını añlatıp olamay. Bu, azatlıq degil de, azatlıqnıñ sıñırlanmasıdır", — dep Emil Kurbedinov yekünledi.
Nevbetteki mahkeme oturışı oraq ayınıñ 28-ne planlaştırıla.
"Hizb ut-Tahrir davası"nıñ altıncı Bağçasaray gruppasınıñ mabüsleri aqqında ne bilemiz
Saban ayınıñ 5-nde saba maalinde Bağçasaray ve Canköy rayonlarında uquq qorçalayıcılar 10 qırımtatarnıñ evinde tintüv keçirdiler. Aynı o künü makeme olardan dörtü - qırımtatar faalcileri Memet Lümanov, Aziz Azizov, Rustem Osmanov ve Mustafa Abduramanov içün tevqif tedbirini sayladı. Olarnı SİZOğa yolladılar.
Daa soñra makeme Canköy ve Canköy rayonınıñ tutulğan sakinlerini SİZOğa yolladı: Enver Halillayev, Nariman Ametov, Ali Mamutov, Cadra köy camisiniñ imamı Vahid Mustafayev ve Arsen Kaşka.
Sabıq imam Remzi Kurtnezirovnıñ hastalıqları sebebinden ev apsine alındı. Tutulğan on kişiniñ episi Rusiyede yasaq etilgen Hizb ut-Tahrir islâm firqasınıñ iştirakçisi ola. Tutulğanlarnıñ çoqusı, çoq balalı qorantalarnıñ babaları ola.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
